കണ്ണൂര്‍ : ഒരു കുറ്റി പിഴുതെടുത്താല്‍ കെ – റെയില്‍ പദ്ധതി ഇല്ലാതാവില്ലെന്ന് കൊടിയേരി. കെ – റെയില്‍ പദ്ധതിയെ എതിര്‍ക്കുന്നവര്‍ കോണ്‍ഗ്രസുകാര്‍ മാത്രമാണെന്നും കേരളത്തിലെ ബഹുഭൂരിപക്ഷം ജനങ്ങളും പദ്ധതിക്കനുകൂലമാണെന്നും സിപിഎം സംസ്ഥാന സെക്രട്ടറി കോടിയേരി ബാലകൃഷ്‌ണന്‍. ഒരു സര്‍വേക്കല്ലെടുത്ത് മാറ്റിയതുകൊണ്ട് മാത്രം കെ – റെയില്‍ പദ്ധതി ഇല്ലാതാകില്ല. വികസന പദ്ധതികള്‍ തടസപ്പെടുത്തുന്നതില്‍ കേരളത്തിലെ ജനങ്ങള്‍ അവരെ ഒറ്റപ്പെടുത്തുക തന്നെ ചെയ്യും. കോണ്‍ഗ്രസിന്റേത് വീരസ്യം പറച്ചിലാണെന്നും യുദ്ധം ചെയ്യാനുള്ള കെല്‍പ്പൊന്നും കേരളത്തിലെ കോണ്‍ഗ്രസിനില്ലെന്നും അദ്ദേഹം കുറ്റപ്പെടുത്തി. കെ – റെയില്‍ പദ്ധതിക്കെതിരെ സമരം ശക്തമാക്കുമെന്നും കോടതിവിധി പോലും മാനിക്കാതെ സ്ഥാപിച്ച സര്‍വേ കല്ലുകള്‍ പിഴുതെറിയുമെന്നും കെപിസിസി അദ്ധ്യക്ഷന്‍ കെ.സുധാകരന്‍ കഴിഞ്ഞ ദിവസം മാദ്ധ്യമങ്ങളോട് പറഞ്ഞിരുന്നു.
