വെണ്മണി : കെ റെയില് വിശദീകരണ യോഗവേദി അടിച്ചു തകര്ത്ത നിലയില്. യു പ്രതിഭ എംഎല്എ ഉദ്ഘാടനം നിര്വഹിച്ച കെ റെയില് വിശദീകരണ യോഗവേദി അടിച്ചു തകര്ത്ത നിലയില്. വെണ്മണി പുന്തലയില് ഇന്നലെയാണ് സംഭവം. ശനിയാഴ്ച വൈകീട്ട് സിപിഎം ഏരിയ കമ്മിറ്റിയുടെ നേതൃത്വത്തിലാണ് വിശദീകരണയോഗം സംഘടിപ്പിച്ചത്. പ്രവര്ത്തകരും നേതാക്കളും മടങ്ങിയ ശേഷമായിരുന്നു സംഭവം. വേദിയിലുണ്ടായിരുന്ന കസേരകളടക്കം അടിച്ചുതകര്ത്ത നിലയിലായിരുന്നു.
സംഭവത്തിന് പിന്നില് പദ്ധതിക്കെതിരായ നാട്ടുകാരുടെ പ്രതിഷേധമാണെന്നായിരുന്നു ആദ്യത്തെ പ്രചരണം. എന്നാല് മദ്യലഹരിയില് പ്രദേശവാസി നടത്തിയ അതിക്രമമാണെന്നാണ് സിപിഎം പറയുന്നത്. ഇയാളെ താക്കീത് ചെയ്ത് വിട്ടയച്ചുവെന്നും രാഷ്ട്രീയവൈരാഗ്യം ഒന്നുമില്ലെന്നും സിപിഎം ഏരിയ കമ്മിറ്റിയംഗവും വെണ്മണി പഞ്ചായത്ത് വൈസ് പ്രസിഡന്റുമായ പി.ആര്.രമേശ്കുമാര് വ്യക്തമാക്കി.
