തിരുവനന്തപുരം : എഐസിസിയുടെ വിലക്കും പാര്ട്ടി അച്ചടക്കവും ലംഘിച്ചു സിപിഎമ്മിന്റെ കണ്ണൂരില് നടന്ന പാര്ട്ടി കോണ്ഗ്രസ് സെമിനാറില് പങ്കെടുത്ത മുതിര്ന്ന കോണ്ഗ്രസ് നേതാവ് കെ.വി.തോമസിനെതിരെ കടുത്ത അച്ചടക്ക നടപടി സ്വീകരിക്കണമെന്നു ഹൈക്കമാന്ഡിനോടു കെപിസിസി നേതൃത്വം. കണ്ണൂരില് സിപിഎം പാര്ട്ടി കോണ്ഗ്രസ് സെമിനാറില് പങ്കെടുത്തതിനു പിന്നാലെയാണ് കെപിസിസി പ്രസിഡന്റ് കെ. സുധാകരന്, കെ.വി. തോമസിനെതിരെ അച്ചടക്ക നടപടി വേണമെന്ന ശുപാര്ശയുമായി കോണ്ഗ്രസ് അധ്യക്ഷ സോണിയാഗാന്ധിക്കു കത്തു നല്കിയത്.
എഐസിസി അംഗമായ കെ.വി. തോമസിനെതിരെ കോണ്ഗ്രസ് ഭരണഘടന പ്രകാരം കെപിസിസി നേതൃത്വത്തിനു തന്നെ അച്ചടക്ക നടപടി സ്വീകരിക്കാമെന്നിരിക്കേയാണ് അച്ചടക്ക നടപടി ആവശ്യപ്പെട്ടു ഹൈക്കമാന്ഡിനെ സമീപിച്ചത്. മുതിര്ന്ന നേതാവും മുന് കേന്ദ്രമന്ത്രിയുമായ കെ.വി. തോമസിനെതിരെ സ്വീകരിക്കേണ്ട നടപടി എഐസിസി നേതൃത്വം തീരുമാനിക്കട്ടെയെന്ന നിലപാട് സ്വീകരിച്ചതിനെ തുടര്ന്നാണു നടപടി ആവശ്യപ്പെട്ടു കത്തു നല്കിയത്.
പാര്ട്ടിയുടെ എല്ലാ അച്ചടക്കവും സെമിനാറില് പങ്കെടുക്കരുതെന്ന വിലക്കും ലംഘിച്ചാണ് തോമസ് പങ്കെടുത്തതെന്നാണു കെ. സുധാകരന്റെ കത്തില് പറയുന്നത്. വൈകാതെ കോണ്ഗ്രസ് നേതൃത്വം നടപടി സ്വീകരിക്കുമെന്നാണു കരുതുന്നത്. തോമസ് കാണിച്ചത് രാഷ്ട്രീയ തറവാടിത്തമില്ലായ്മയാണ്. അദ്ദേഹം സിപിഎമ്മുമായി കച്ചവടം നടത്തിയിട്ട് നില്ക്കുകയാണെന്നും സുധാകരന് പറഞ്ഞു.
