തിരുവനന്തപുരം: മുഖ്യമന്ത്രിയുടെയും സര്ക്കാരിന്റെയും തെറ്റായ ചെയ്തികളെ തുറന്ന് കാട്ടിയതിന്റെ പേരിലാണ് കെ കെ രമയ്ക്ക് വധഭീഷണി ഉണ്ടായതെന്നും സംഭവത്തില് വിശദമായ അന്വേഷണം വേണമെന്നും കെപിസിസി പ്രസിഡന്റ് കെ സുധാകരന് എംപി. നിയമസഭയില് കെ കെ രമയുടെ സാന്നിധ്യം ഏറ്റവും കൂടുതല് ഭയക്കുന്നത് മുഖ്യമന്ത്രിയാണെന്നും അദ്ദേഹം കൂട്ടിച്ചേര്ത്തു. സിപിഐഎമ്മിലെ ഉന്നതരുടെ പങ്ക് അന്വേഷിക്കണമെന്ന് കെ സുധാകരന് പറഞ്ഞു.
ടിപിയുടെ മരണശേഷവും ആ ആത്മാവിനെ കുലംകുത്തിയെന്ന് വിളിച്ച് അധിക്ഷേപിച്ച മുഖ്യമന്ത്രി എന്തും ചെയ്യുന്ന മനോനിലയിലേക്ക് അധപതിച്ചു. കോണ്ഗ്രസിന്റെയും യുഡിഎഫ് നേതാക്കളുടെയും ശക്തമായ എതിര്പ്പിനെ തുടര്ന്ന് എം എം മണി കെ കെ രമയ്ക്കെതിരായ പരാമര്ശം പിന്വലിച്ചെങ്കിലും ഒടുങ്ങാത്ത പക മനസില് സൂക്ഷിക്കുന്നവരാണ് സിപിഐഎമ്മുകാര്. ടിപിയെ വധിക്കാന് ഉത്തരവ് നല്കിയ സിപിഐഎം ഉന്നതര് ഇപ്പോഴും പുറത്തുവിലസുകയാണ് അദ്ദേഹം പറഞ്ഞു.
