തിരുവനന്തപുരം: നെഹ്റു കുടുംബത്തെയും കോണ്ഗ്രസ് ദേശീയ നേതൃത്വത്തെയും വിമര്ശിച്ചെന്ന വാര്ത്ത അടിസ്ഥാനരഹിതമെന്ന് കെപിസിസി പ്രസിഡന്റ് കെ.സുധാകരന്. തന്റെ വാക്കുകള് തെറ്റായി നല്കിയ ചാനലിനെതിരെയും മാധ്യമ പ്രവര്ത്തകനെതിരെയും നിയമനടപടി സ്വീകരിക്കുമെന്ന് സുധാകരന് പറഞ്ഞു. “താന് പറയാത്ത കാര്യങ്ങളാണ് ചാനല് വാര്ത്തയായി നല്കിയത്. തെറ്റായ വാര്ത്ത വന്നപ്പോള് ശക്തമായ പ്രതിഷേധം അവരെ അറിയിച്ചിരുന്നു. നിയമനടപടി സ്വീകരിക്കുമെന്ന് പറഞ്ഞതോടെ അവര് വാര്ത്ത പിന്വലിച്ചു. എന്നാല് നെഹ്റു കുടുംബത്തെ തള്ളിപ്പറഞ്ഞെന്ന രീതിയില് വീണ്ടും അവര് വാര്ത്ത കൊടുത്തു’- സുധാകരന് മാധ്യമങ്ങളോട് പറഞ്ഞു. ജി-23 നേതാക്കളെ ഉള്ക്കൊള്ളാന് ഗാന്ധി കുടുംബത്തിന് കഴിയാത്തത് നിര്ഭാഗ്യകരമാണെന്നും പാര്ട്ടിക്കുള്ളില് തിരുത്തലിന് ശ്രമിക്കുന്നവരെ ഉള്ക്കൊള്ളാന് നേതൃത്വം തയ്യാറാകണമെന്ന് സുധാകരന് പറഞ്ഞു എന്ന് തരത്തില് നേരത്തെ വാര്ത്ത വന്നിരുന്നു.
