തിരുവനന്തപുരം : വ്യാജരേഖക്കേസില് മുന് എസ്.എഫ്.ഐ നേതാവ് കെ. വിദ്യയുടെ അറസ്റ്റില് പ്രതികരിച്ച് കെ.പി.സി.സി അദ്ധ്യക്ഷന് കെ. സുധാകരന്. യു.ഡി.എഫ് ഭരണകാലത്ത് ടി.പി. ചന്ദ്രശേഖരന് വധക്കേസിലെ പ്രതികളെ പിടികൂടാന് പോലീസിന് ഇത്രയും ബുദ്ധിമുട്ടേണ്ടി വന്നില്ലെന്നും ഇതാണ് ഉമ്മന്ചാണ്ടിയും പിണറായി വിജയനും തമ്മിലുള്ള വ്യത്യാസമെന്നും സുധാകരന് പറഞ്ഞു. യു.ഡി.എഫ് ഭരണകാലത്ത് ടി.പി. ചന്ദ്രശേഖരനെ നിഷ്ഠൂരമായി കൊലപ്പെടുത്തിയശേഷം സിപിഎം സംരക്ഷണത്തിലുള്ള മുടക്കോഴി മലയില് ഒളിച്ചു താമസിച്ച പ്രധാന പ്രതികളെ സാഹസികമായി പിടികൂടാന് എടുത്തതിനോളം ദിവസമെടുത്താണ് പിണറായി സര്ക്കാരിന്റെ കാലത്ത് എസ്എഫ്ഐ വനിതാ നേതാവിനെ പോലീസ് പിടികൂടിയതെന്ന് സുധാകരന് പറഞ്ഞു.
‘സിപിഎം നേതാക്കള് ചിറകിലൊളിപ്പിച്ച എസ്.എഫ്.എ നേതാവിനെ പിടികൂടാന് പോലീസിന് 16 ദിവസം വേണ്ടി വന്നു. പ്രതിക്ക് തെളിവുകള് നശിപ്പിക്കാനും ഒളിവില് കഴിയാനും കൂട്ടുനിന്ന പോലീസ് കോടതിയില് നിന്ന് മുന്കൂര് ജാമ്യം നേടാനുള്ള ശ്രമത്തിനും ഒത്താശ ചെയ്തു. ഗത്യന്തരമില്ലാതെയാണ് ഒടുവില് പാര്ട്ടി തയാറാക്കിയ തിരക്കഥയുടെ അടിസ്ഥാനത്തില് പോലീസിന് കീഴടങ്ങിയത്. മഹാരാജാസ് കോളജിന്റെ പേരില് വ്യാജസര്ട്ടിഫിക്കറ്റുകള് തയാറാക്കാനും മൂന്നു കോളജുകളില് അദ്ധ്യാപികയായി ജോലി നേടാനും വിദ്യയ്ക്ക് സഹായം നല്കിയവരെയും ഒളിവില് പോകാന് സഹായിച്ചവരെയും നിയമത്തിന്റെ മുന്നില് കൊണ്ടുവരണം’, സുധാകരന് ആവശ്യപ്പെട്ടു.
