തിരുവനന്തപുരം: എല്‍.പി-യു.പി- ഹൈസ്‌ക്കൂള്‍ പരീക്ഷ ഉച്ചക്ക് നടത്തുന്നത് ബാലാവകാശ ലംഘനമെന്ന് ബി.ജെ.പി സംസ്ഥാന അധ്യക്ഷന്‍ കെ.സുരേന്ദ്രന്‍. കടുത്ത വേനലില്‍ കൊച്ചുകുട്ടികള്‍ക്ക് ഉച്ചക്ക് വാര്‍ഷിക പരീക്ഷ നടത്താനുള്ള വിദ്യാഭ്യാസവകുപ്പിന്റെ സമീപനത്തിനെതിരെയാണ് കെ.സുരേന്ദ്രന്‍ രംഗത്ത് വന്നിരിക്കുന്നത്. സംസ്ഥാനത്ത് ഇത്രയും ഗൗരവതരമായ ബാലാവകാശ ലംഘനം നടന്നിട്ടും അനങ്ങാതിരിക്കുന്ന സംസ്ഥാന ബാലാവകാശ കമ്മീഷന്‍ കേരളത്തിന് അപമാനമാണ്. . 11 മുതല്‍ മൂന്ന് വരെ സൂര്യാഘാത സാധ്യതയുണ്ടെന്നും ആളുകള്‍ പുറത്തിറങ്ങരുതെന്നും പറയുന്ന സര്‍ക്കാര്‍ കുരുന്നുകളെ കൊടുംചൂടിലേക്ക് ഇറക്കിവിടുകയാണെന്ന് സുരേന്ദ്രന്‍ ആരോപിക്കുന്നു.
അതസേമയം അടിയന്തരമായി പരീക്ഷകള്‍ മാറ്റിവെക്കാന്‍ സര്‍ക്കാര്‍ തയാറാവണമെന്ന് കെ.സുരേന്ദ്രന്‍ ആവശ്യപ്പെട്ടു. കടുത്ത വേനലില്‍ സ്വന്തം വാഹനത്തില്‍ വരുന്ന കുട്ടികള്‍ മാത്രമല്ല പരീക്ഷ എഴുതാന്‍ വരുന്നതെന്ന് വിദ്യാഭ്യാസ വകുപ്പ് മനസിലാക്കണം. കാല്‍ നടയായും പൊതുവാഹന സൗകര്യം ഉപയോഗിച്ചും വരുന്ന പാവപ്പെട്ട വിദ്യാര്‍ഥികളെയാണ് ഇത്തരം തുഗ്ലക്ക് പരിഷ്‌ക്കാരങ്ങള്‍ ബാധിക്കുന്നത്. നട്ടുച്ചയ്ക്ക് പുറത്തിറങ്ങേണ്ടി വരുന്നത് കുട്ടികള്‍ക്ക് ശാരീരികമായും മാനസികമായും ഗുരുതരമായ ആരോഗ്യപ്രശ്‌നങ്ങളുണ്ടാക്കുമെന്നും കെ.സുരേന്ദ്രന്‍ പറയുന്നു.
