കോട്ടയം: സനാതന ധര്മത്തെ ഉന്മൂലനം ചെയ്യണമെന്ന ഉദയനിധി സ്റ്റാലിന്റെ പ്രസ്താവനയെ തമിഴ്നാട്ടിലെ കോണ്ഗ്രസ് നേതാവ് കാര്ത്തി ചിദംബരം പിന്തുണച്ചതോടെ കോണ്ഗ്രസിന്റെ തനിനിറം പുറത്തായെന്നു ബിജെപി സംസ്ഥാന അധ്യക്ഷന് കെ.സുരേന്ദ്രന്. ഉദയനിധി സ്റ്റാലിന്റെയും കാര്ത്തി ചിദംബരത്തിന്റെയും പ്രസ്താവനയോടുള്ള രാഹുല് ഗാന്ധിയുടെയും കേരളത്തിലെ കോണ്ഗ്രസ് നേതാക്കളുടെയും മൗനം അവരുടെ ഹിന്ദുവിരുദ്ധതയുടെ ഉദാഹരണമാണെന്നും സുരേന്ദ്രന് കുറ്റപ്പെടുത്തി.
”സ്നേഹത്തിന്റെ കടയല്ല വംശീയോന്മൂലനത്തിന്റെ കടയാണു കോണ്ഗ്രസ് തുറക്കാന് ശ്രമിക്കുന്നത്. ഗണപതിയെ അവഹേളിച്ച സ്പീക്കര് എ.എന്. ഷംസീറും സനാതന ധര്മത്തെ ഉന്മൂലനം ചെയ്യുമെന്നു പ്രഖ്യാപിച്ച ഉദയനിധി സ്റ്റാലിനും ഒരു നാണയത്തിന്റെ രണ്ടു വശങ്ങളാണ്. മീശ നോവലില് ഹിന്ദു സ്ത്രീകളെ അപമാനിച്ചപ്പോള് നോവലിസ്റ്റിന്റെ കൂടെ നിന്നവരാണു കോണ്ഗ്രസുകാര്. എല്ലാകാലത്തും ഹിന്ദുവിരുദ്ധത പ്രകടിപ്പിക്കുന്നതില് സിപിഎമ്മിനോടു മത്സരിക്കുന്നതാണു കോണ്ഗ്രസിന്റെയും രീതി” – കെ.സുരേന്ദ്രന് ആരോപിച്ചു.
