തിരുവനന്തപുരം : കെ.ടി. ജലീലിന് എംഎല്എ സ്ഥാനത്തു തുടരാന് യോഗ്യതയില്ലെന്നു ബിജെപി സംസ്ഥാന അധ്യക്ഷന് കെ.സുരേന്ദ്രന്. സംസ്ഥാന മന്ത്രിസഭയില് അംഗമായിരിക്കെ ഒരു വിദേശ രാജ്യത്തേക്കു കേരളത്തിലെ ഒരു പത്രം നിരോധിക്കണം എന്നാവശ്യപ്പെട്ട് കത്തെഴുതിയ ജലീലിന്റെ നടപടി പ്രോട്ടോകോള് ലംഘനമാണ്. ഒരു നിമിഷം പോലും എംഎല്എയായി തുടരാന് അദ്ദേഹത്തിന് അവകാശമില്ലെന്നും സുരേന്ദ്രന് വാര്ത്താസമ്മേളനത്തില് പറഞ്ഞു.
ഒരു സംസ്ഥാനത്തിലെ മന്ത്രിക്കും ഇങ്ങനെ ഒരു കത്തെഴുതാന് അവകാശമില്ല. വിദേശ കോണ്സുലേറ്റുമാരുമായും വിദേശത്തെ ഭരണാധികാരികളുമായും വിദേശകാര്യ വകുപ്പിന്റെ അനുമതിയോടെയല്ലാതെ ഒരു ബന്ധവും പാടില്ലെന്ന ചട്ടമാണ് കെ.ടി ജലീല് ലംഘിച്ചിരിക്കുന്നത്. രാജിവച്ചില്ലെങ്കില് നിയമസഭാംഗത്വം റദ്ദാക്കാന് മുഖ്യമന്ത്രി തയാറാകണമെന്നും സുരേന്ദ്രന് പറഞ്ഞു.