പ്രേക്ഷകര് ആകാംക്ഷയോടെ കാത്തിരിക്കുന്ന ചിത്രമാണ് ‘കാപ്പ’. ഷാജി കൈലാസാണ് ചിത്രം സംവിധാനം ചെയ്യുന്നത്. പൃഥ്വിരാജ് പ്രധാന കഥാപാത്രമാകുന്ന ചിത്രത്തിന്റെ ട്രെയിലര് അപ്ഡേറ്റ് പുറത്ത് വിട്ടു. ട്രെയിലര് ഇന്ന് വൈകുന്നേരം ആറ് മണിക്കാണ് ഇറങ്ങുക. ചിത്രം റിലീസ് ചെയ്യുക 22നാണ്. അപര്ണ ബാലമുരളി ആണ് ചിത്രത്തില് നായിക വേഷത്തില് എത്തുന്നത്. ആസിഫ് അലി, അന്ന ബെന് എന്നിവര് പ്രധാന കഥാപാത്രങ്ങളായി ചിത്രത്തില് അഭിനയിക്കുന്നു.
ഇന്ദുഗോപന്റെ പ്രശസ്ത നോവലായ ‘ശംഖുമുഖി’യെ അടിസ്ഥാനപ്പെടുത്തിയാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ഇന്ദുഗോപന് തന്നെയാണ് ചിത്രത്തിന്റെ രചനയും നിര്വഹിക്കുന്നത്. ജിനു വി ഏബ്രഹാം, ഡോള്വിന് കുര്യാക്കോസ് ദിലീഷ് നായര് എന്നിവരുടെ പങ്കാളിത്തത്തില് ആരംഭിച്ച തിയ്യേറ്റര് ഓഫ് ഡ്രീംസ്, സരിഗമ ഇന്ത്യ പ്രൈവറ്റ് ലിമിറ്റഡ്, ഫെഫ്ക റൈറ്റേഴ്സ് യൂണിയന്റെ സഹകരണത്തില് നിര്മ്മിക്കുന്ന ചിത്രമാണ് ‘കാപ്പ’. സരിഗമയും തീയറ്റര് ഓഫ് ഡ്രീംസും ഈ ചിത്രം തിയറ്ററുകളില് എത്തിക്കുന്നത്.
തിരുവനന്തപുരത്തെ ലോക്കല് ഗുണ്ടകളുടെ പശ്ചാത്തലത്തില് കഥ പറയുന്ന കാപ്പയില് ദിലീഷ് പോത്തന്, ജഗദീഷ്, നന്ദു തുടങ്ങി വലിയ താരനിരയും അഭിനയിക്കുന്നു. ചിത്രത്തിലെ പൃഥ്വിരാജിന്റെ ലുക്കും ‘കൊട്ട മധു’ എന്ന കഥാപാത്രവും ഇതിനോടകം തന്നെ സോഷ്യല് മീഡിയകളില് ശ്രദ്ധ നേടിയിരുന്നു. ഛായാഗ്രഹണം- ജോമോന് ടി ജോണ്, പ്രൊഡക്ഷന് കണ്ട്രോളര് സഞ്ചു ജെ, അസോസിയേറ്റ് ഡയറക്ടര് മനു സുധാകരന്, മേക്കപ്പ് സജി കാട്ടാക്കട, സ്റ്റില്സ്-ഹരി തിരുമല, പിആര്ഒ ശബരി എന്നിവരുമാണ്.
