ന്യൂഡല്ഹി : കടയ്ക്കാവൂര് പോക്സോ കേസില് മാതാവിനെതിരെ സുപ്രീം കോടതിയില് അധിക സത്യവാങ്മൂലം ഫയല് ചെയ്ത് ഹരജിക്കാരനായ കുട്ടി. മാതാവിനെതിരെയുള്ള മൊഴി നല്കിയത് ആരുടേയും പ്രേരണ കൊണ്ടല്ലെന്നും പിതാവ് മാതാവിനെതിരെ പരാതി നല്കാന് പ്രേരിപ്പിച്ചിട്ടില്ലെന്നും കുട്ടി ഹരജിയില് വ്യക്തമാക്കുന്നു. ആരോപണവിധേയായ മാതാവ് നിരപരാധിയാണെന്ന പ്രത്യേക അന്വേഷണ സംഘത്തിന്റെ റിപ്പോര്ട്ട് റദ്ദാക്കണം എന്നാണ് ഹരജിയിലെ പ്രധാന ആവശ്യം.
പതിമൂന്നുകാരനെ മാതാവ് ലൈംഗികമായി പീഡിപ്പിച്ചെന്നാണ് കേസ്. ആരോപണം വ്യാജമാണെന്ന് ഡോ.ദിവ്യ ഗോപിനാഥിന്റെ നേതൃത്വത്തിലുള്ള അന്വേഷണ സംഘം റിപ്പോര്ട്ട് നല്കിയിരുന്നു. ഈ റിപ്പോര്ട്ടിന്റെ അടിസ്ഥാനത്തില് കേസ് റദ്ദാക്കാന് ഹൈക്കോടതി ഉത്തരവിടുകയും ചെയ്തു. തുടര്ന്ന് തിരുവനന്തപുരം പോക്സോ കോടതി കേസ് നടപടികള് അവസാനിപ്പിച്ചിരുന്നു. എന്നാല് പ്രോസിക്യൂഷന്റെ ഭാഗം മാത്രമാണ് ഹൈക്കോടതി കേട്ടതെന്നും തന്റെ ഭാഗം കേള്ക്കാതെയാണ് ഉത്തരവിറക്കിയതെന്നും കാണിച്ചാണ് കുട്ടി അധിക സത്യവാങ്മൂലം ഫയല് ചെയ്തിരിക്കുന്നത്.
