പാലക്കാട് : നര്ത്തകി നീനാ പ്രസാദിന്റെ നൃത്തപരിപാടി ജില്ലാ ജഡ്ജി ഇടപെട്ട് തടസപ്പെടുത്തിയെന്ന് ആരോപിച്ച് പാലക്കാട് കോടതി വളപ്പില് അഭിഭാഷകര് പ്രതിഷേധിച്ചതില് ജഡ്ജി കലാം പാഷയുടെ വിമര്ശനം. ഒരിക്കലും സംഭവിക്കാന് പാടില്ലാത്തതാണ് കോടതി വളപ്പില് നടന്നത്. വേദനിപ്പിക്കുന്ന മുദ്രാവാക്യങ്ങളുമായാണ് അഭിഭാഷകര് തനിക്കെതിരെ പ്രകടനം നടത്തിയത്. താന് സകല കലകളെയും ബഹുമാനിക്കുന്ന ആളാണ്. അടിസ്ഥാനമില്ലാത്ത കാര്യത്തിനായിരുന്നു കോടതി വളപ്പിലും പുറത്തുമുള്ള പ്രതിഷേധം.
അഭിഭാഷകര് സ്വയം ആത്മ പരിശോധന നടത്തണമെന്നും കലാം പാഷ പറഞ്ഞു. നിയമ വിദ്യാര്ഥികള്ക്കായി ബാര് കൗണ്സില് സംഘടിപ്പിച്ച ശില്പശാലയില് സംസാരിക്കുകയായിരുന്നു അദ്ദേഹം. പത്ത് ദിവസം മുന്പ് മോയിന്സ് എല്.പി സ്കൂളിലെ നൃത്ത പരിപാടി ശബ്ദം ഉയര്ന്നുവെന്ന കാരണം പറഞ്ഞത് ജഡ്ജി പോലീസിനെക്കൊണ്ട് തടഞ്ഞുവെന്നാണ് ആക്ഷേപം.
