കളിയിക്കാവിള : കളിയിക്കാവിള കൊലപാതക കേസിലെ പ്രതികളെ കേരള-തമിഴ്നാട് അതിര്‍ത്തിയിലെ കുഴിത്തുറയിലെത്തിച്ചു. പ്രതികളുമായി പോലീസ് ഉടന്‍ തെളിവെടുപ്പ് നടത്തും. കേസില്‍ ഗൂഢാലോചനയില്‍ പങ്കുള്ള കൂടുതൽ പ്രതികളുടെ അറസ്റ്റ് ഇന്ന് രേഖപ്പെടുത്തും. സംശയത്തിന്റെ അടിസ്ഥാനത്തിൽ 23 പേരെ തമിഴ്നാട് കർണാടക പോലീസ് കസ്റ്റഡിയിൽ നിർത്തിയിരിക്കുകയാണ്.
ഇന്ന് പുലര്‍ച്ചെ അഞ്ചരയോടെയാണ് തൌഫീഖ്, ഷഫീഖ് എന്നീ മുഖ്യപ്രതികളെ തമിഴ്നാട്, കേരള അതിര്‍ത്തിയിലേക്ക് പോലീസ് കൊണ്ടുവന്നത്. കുഴിത്തുറ പോലീസ് സ്റ്റേഷനിലേക്കാണ് ഇവരെ എത്തിച്ചത്. രാവിലെ തന്നെ ഇവരെ കുഴിത്തുറ കോടതിയില്‍ ഹാജരാക്കിയേക്കും. കഴിഞ്ഞ ദിവസം ഉഡുപ്പിയില്‍ നിന്നാണ് ഇവര്‍ പിടിയിലായത്. ഉഡുപ്പി റെയില്‍വെ സ്റ്റേഷനില്‍ നിന്ന് ഇവരെ റെയില്‍വെ-കര്‍ണാടക-തമിഴ്നാട് പോലീസ് സംയുക്തമായി പിടികൂടുകയായിരുന്നു.
