ന്യൂഡല്ഹി : കോണ്ഗ്രസ്സില് വന്നത് കേന്ദ്രത്തെ പാഠം പഠിപ്പിക്കാന് വേണ്ടിയെന്ന് കനയ്യ കുമാര്. ഇന്ത്യയെ രക്ഷിക്കാന് ഫാസിസ്റ്റ് ശക്തികളെ പരാജയപ്പെടുത്തണമെന്നും ബി ജെ പിക്കെതിരായ പോരാട്ടത്തില് ഇപ്പോഴും ഇടതുപക്ഷത്തോടൊപ്പം തന്നെയാണെന്നും അദ്ദേഹം വ്യക്തമാക്കി. ഡി രാജയുടെ പ്രതികരണം സ്വാഭാവികമാണെന്നും പാര്ട്ടി വിട്ടാല് നേതാക്കള് കുറ്റപ്പെടുത്തുന്നത് സാധാരണയാണെന്നും കനയ്യ കുമാര് പറഞ്ഞു.
സിപിഐ ദേശീയ നിര്വാഹക സമിതി അംഗമെന്ന പദവിയായിരുന്നു കനയ്യ കുമാര് വഹിച്ചിരുന്നത്. കമ്മ്യുണിസ്റ്റ് പാര്ട്ടിയേയും ആശയങ്ങളെയും കനയ്യ കുമാര് ചതിച്ചുവെന്നതിന്റെ പേരിൽ സിപിഐ ജനറല് സെക്രട്ടറി ഡി.രാജ ഇദ്ദേഹത്തെ സിപിഐയില് നിന്ന് പുറത്താക്കിയതായി അറിയിച്ചിരുന്നു. കോണ്ഗ്രസ് രക്ഷപ്പെട്ടില്ലെങ്കില് രാജ്യം രക്ഷപ്പെടില്ലെന്നും അതുകൊണ്ടാണ് താന് കോണ്ഗ്രസിലേക്ക് എത്തിയതെന്നും കനയ്യ കുമാര് പറയുന്നു.