മുംബൈ: മോഡേണ്‍ വസ്ത്രം ധരിച്ച് ക്ഷേത്രദര്‍ശനം നടത്തുന്നവരെ വിമര്‍ശിച്ച് ബോളിവുഡ് നടി കങ്കണ. ട്വിറ്ററിലൂടെയായിരുന്നു വിമര്‍ശനം. മോഡേണ്‍ വസ്ത്രങ്ങള്‍ വെള്ളക്കാര്‍ കൊണ്ടുവന്നതാണെന്നും ഇത്തരം വസ്ത്രങ്ങള്‍ ധരിച്ച് ക്ഷേത്രദര്‍ശനം നടത്തുന്നവര്‍ക്കെതിരെ കര്‍ശന നിയമം കൊണ്ടുവരണമെന്നും കങ്കണ ട്വീറ്റ് ചെയ്തു. ഹിമാചല്‍ പ്രദേശിലെ പ്രശസ്ത ശിവക്ഷേത്രമായ ബജിനാഥില്‍ മോഡേണ്‍ വസ്ത്രം ധരിച്ച് ദര്‍ശനം നടത്തുന്ന പെണ്‍കുട്ടിയുടെ ചിത്രം റിട്വീറ്റ് ചെയ്തുകൊണ്ടായിരുന്നു കങ്കണയുടെ പ്രതികരണം.
ഷോര്‍ട്‌സും ടി ഷര്‍ട്ടും ധരിച്ചതിന്റെ പേരില്‍ വത്തിക്കാനില്‍ നിന്ന് നേരിടേണ്ടി വന്ന ദുരനുഭവവും നടി പങ്കുവെച്ചിട്ടുണ്ട്.’പാശ്ചാത്യ വസ്ത്രങ്ങള്‍ കൊണ്ടുവന്നതും അത് പ്രചരിപ്പിച്ചതും വെള്ളക്കാരാണ്. ഒരിക്കല്‍ ഷോട്സും ടീ ഷര്‍ട്ടും ധരിച്ച് വത്തിക്കാനില്‍ പോയിരുന്നു. ആ വസ്ത്രം ധരിക്കാന്‍ അന്ന് അവര്‍ എന്നെ അനുവദിച്ചില്ല. പിന്നീട് ഹോട്ടലില്‍ പോയി വസ്ത്രം മാറേണ്ടി വന്നു- കങ്കണ പറഞ്ഞു.
