കോട്ടയം: കേരള കോണ്‍ഗ്രസ് ജോസ് കെ. മാണി വിഭാഗത്തെ എല്‍ഡിഎഫിനൊപ്പം ചേര്‍ക്കാനുള്ള നീക്കങ്ങള്‍ ദ്രുതഗതിയില്‍ പുരോഗമിക്കുന്നതിനിടെ നിയമസഭാ സീറ്റ് വിഷയത്തില്‍ സിപിഐയില്‍ എതിര്‍പ്പ് ശക്തമാകുന്നു. കാഞ്ഞിരപ്പള്ളി സീറ്റ് സംബന്ധിച്ചാണ് സിപിഐയിലെ പ്രാദേശിക ഘടകങ്ങളില്‍ എതിര്‍പ്പ് പുകയുന്നത്.
സിപിഐ നാളുകളായി മത്സരിക്കുന്ന സീറ്റാണ് കാഞ്ഞിരപ്പള്ളി. നിലവില്‍ കേരള കോണ്‍ഗ്രസ് ജോസ് വിഭാഗത്തിലെ എന്‍. ജയരാജാണ് ഇവിടുത്തെ എംഎല്‍എ. ഈ സീറ്റ് ജോസ് വിഭാഗത്തിനു തന്നെ നല്‍കുമെന്നാണ് സൂചനകള്‍. ഇതിനെതിരെയാണ് മണ്ഡലത്തിലെ സിപിഐയുടെ ശക്തി കേന്ദ്രങ്ങളില്‍ എതിര്‍പ്പ് പുകയുന്നത്.
കാഞ്ഞിരപ്പള്ളി, കങ്ങഴ, വാഴൂര്‍ തുടങ്ങിയ സ്ഥലങ്ങളിലാണ് എതിര്‍പ്പുമായി അണികള്‍ രംഗത്തെത്തിയത്. വിവിധ പ്രദേശങ്ങളിലെ പ്രവര്‍ത്തകര്‍ തങ്ങളുടെ എതിര്‍പ്പ് സമൂഹ മാധ്യമങ്ങളില്‍ പങ്കുവെയ്ക്കുകയും ചെയ്തു. കഴിഞ്ഞ തവണ സിപിഐ സംസ്ഥാന കമ്മിറ്റി അംഗമായിരുന്ന അഡ്വ. വി.ബി ബിനുവിനോട് നേരിയ മാര്‍ജിനിലാണ് ജയരാജ് ജയിച്ചത്.
3000ല്‍പരം വോട്ടുകള്‍ മാത്രമായിരുന്നു ജയരാജിന്‍റെ ഭൂരിപക്ഷം. 2011ലെ തെരഞ്ഞെടുപ്പില്‍ ജയരാജിന് 12000നു മുകളില്‍ ഉണ്ടായിരുന്ന ഭൂരിപക്ഷമാണ് 3,000മായി കുറഞ്ഞത്. ചിട്ടയോടെ പ്രവര്‍ത്തിച്ചാല്‍ ഇത്തവണ സീറ്റില്‍ വിജയിക്കാമെന്നായിരുന്നു സിപിഐയിലെ കീഴ്ഘടകങ്ങളുടെ കണക്കു കൂട്ടല്‍. ഇത് ഇല്ലാതാക്കരുതെന്ന അഭിപ്രായമാണ് മണ്ഡലത്തിലെ വിവിധ പ്രദേശങ്ങളിലുള്ള അണികള്‍ പ്രകടിപ്പിക്കുന്നത്.
