കരിപ്പൂര് : കോഴിക്കോട് വിമാനത്താവളത്തില് വലിയ വിമാന സര്വിസ് പുനരാരംഭിക്കാന് നടപടികള് തുടങ്ങി. കോഴിക്കോട് വിമാനത്താവളത്തില് ഡയറക്ടറേറ്റ് ജനറല് ഓഫ് സിവില് ഏവിയേഷന് (ഡി.ജി.സി.എ) സംഘം സുരക്ഷ പരിശോധന നടത്തി. ബുധനാഴ്ച ഓപറേഷന്സ് ഡയറക്ടര് എസ്.ദുരൈരാജ്, ഡെപ്യൂട്ടി ഡയറക്ടര്മാരായ പ്രമോദ് കുമാര്, എസ്.പി റായ് എന്നിവരടങ്ങിയ സംഘമാണ് പരിശോധന നടത്തിയത്. റിപ്പോര്ട്ട് കരിപ്പൂരിന് അനുകൂലമാകുമെന്നാണ് സൂചന. ഇതിന്റെ അടിസ്ഥാനത്തില് വലിയ വിമാന സര്വിസ് പുനരാരംഭിക്കാനാണ് സാധ്യത. റണ്വേ നീളം കുറച്ച് റെസ നീളം കൂട്ടാനുളള നീക്കവും ഉപേക്ഷിക്കും. പകരം റണ്വേ നീളം കുറക്കാതെ റെസയുടെ നീളം വര്ധിപ്പിക്കാനാണ് സാധ്യത.
റണ്വേ, റെസ തുടങ്ങിയ ഭാഗങ്ങള് സന്ദര്ശിച്ചു. ഡി.ജി.സി.എ സംഘം നേരത്തെ നല്കിയ റിപ്പോര്ട്ടില് നിര്ദേശിച്ച കാര്യങ്ങള് നടപ്പിലാക്കിയോ എന്നും പരിശോധിച്ചു. കഴിഞ്ഞ വര്ഷം നവംബറിലായിരുന്നു ഡി.ജി.സി.എ സംഘം മുമ്പ് സന്ദര്ശിച്ചത്. കൂടാതെ, വിമാനാപകട അന്വേഷണ റിപ്പോര്ട്ടില് നിര്ദേശിച്ച വിന്ഡ് സെന്സര് പുനഃസ്ഥാപിച്ചതും മറ്റ് അടിസ്ഥാന സൗകര്യങ്ങളും സംഘം വിലയിരുത്തി. കരിപ്പൂരിലെ വിവിധ വകുപ്പു മേധാവികളുമായി ഇവര് കൂടിക്കാഴ്ച നടത്തി. റിപ്പോര്ട്ട് ഉടന് കേന്ദ്ര വ്യോമയാന മന്ത്രാലയത്തിന് കൈമാറും. ഇതിന് ശേഷമാകും വലിയ വിമാനങ്ങള് പുനരാരംഭിക്കുന്നത് സംബന്ധിച്ചുള്ള അന്തിമ തീരുമാനമുണ്ടാകുക. പരിശോധന പൂര്ത്തിയാക്കി സംഘം ഡല്ഹിക്ക് മടങ്ങി.
