പത്തനംതിട്ട : കര്ക്കിടകവാവ് ബലിതര്പ്പണവുമായി ബന്ധപ്പെട്ട് ജില്ലയുടെ വിവിധ ഭാഗങ്ങളില് നടക്കുന്ന ചടങ്ങുകള് ഹരിതചട്ടം പൂര്ണ്ണമായി പാലിച്ച് നടത്തണമെന്നും സംഘാടകര് കര്ശനമായ മുന്കരുതലുകള് സ്വീകരിക്കണമെന്നും ജില്ലാ ശുചിത്വ മിഷന് അറിയിച്ചു. ബലിതര്പ്പണ ചടങ്ങുകളില് നിരോധിത പ്ലാസ്റ്റിക് ഉല്പന്നങ്ങള് പൂര്ണ്ണമായും ഒഴിവാക്കി പ്രകൃതിസൗഹൃദ വസ്തുക്കള് ഉപയോഗിക്കണം. തര്പ്പണത്തിന് ഉപയോഗിക്കുന്ന തുണികള് ഉള്പ്പെടെയുള്ള വസ്തുക്കള് പുഴയിലോ മറ്റ് ജലാശയങ്ങളിലോ ഉപേക്ഷിക്കാന് പാടില്ല.
ചടങ്ങുകളുടെ ഭാഗമായുള്ള ഭക്ഷണ വിതരണത്തിനായി സ്റ്റീല് പ്ലേറ്റുകളും സ്റ്റീല് ഗ്ലാസുകളും മാത്രമെ ഉപയോഗിക്കാവൂ. കൂടാതെ ചടങ്ങുകള് നടക്കുന്ന സ്ഥലങ്ങളില് ജൈവ-അജൈവ മാലിന്യങ്ങള് വേര്തിരിച്ചു ശേഖരിക്കുന്നതിനായി പ്രത്യേക ബിന്നുകള് സ്ഥാപിക്കണം. ശേഖരിച്ച മാലിന്യങ്ങള് ശാസ്ത്രീയമായി സംസ്കരിക്കുന്നതിനുള്ള തദ്ദേശീയമായ ക്രമീകരണങ്ങളും ഒരുക്കേണ്ടതാണെന്നും ജില്ലാ ശുചിത്വ മിഷന് അറിയിച്ചു.
