പയ്യനാമൺ : കോന്നി പഞ്ചായത്തിലെ ഏഴാം വാർഡിൽപ്പെട്ട കാർമല- അടുകാട്-പയ്യനാമൺ റോഡിൽ യാത്രാക്ലേശം നേരിടുന്നു. റോഡ് നന്നാക്കാനായി മെറ്റലും മണലും ഇറക്കിയിട്ട് മാസങ്ങൾ ആയി. ഇതുവരെ പണി തുടങ്ങിയിട്ടില്ല. ഇടയ്ക്ക് കുറച്ച് സ്ഥലങ്ങൾ കോൺക്രീറ്റ് നടത്തിയ ശേഷം പണി ഉപേക്ഷിച്ചനിലയിൽ ആണ്.
ക്രഷർ കമ്പനികൾ നിരവധിയുള്ള പ്രദേശമാണ് അടുകാടും കാർമലും. ഇവിടങ്ങളിൽനിന്നു അമിതഭാരവുമായി വരുന്ന വാഹനങ്ങൾ കാരണം റോഡ് ഇരുത്തുന്നത് പതിവാണ്. പുറമേ മഴക്കാലത്ത് ഓടയില്ലാത്തതിനാൽ വെള്ളം റോഡിലൂടെ ഒഴുകും. റോഡിലുടനീളം ഉള്ള കുഴികൾ കാൽനടയാത്രക്കാർക്കും ഇരുചക്രവാഹനയാത്രക്കാർക്കും അപകടഭീഷണിയാകുന്നു. 21 ലക്ഷം രൂപ ചെലവിൽ റോഡ് നന്നാക്കാൻ കരാർ നൽകിയതാണ്.
