ബെംഗളൂരു: കര്ണാടകയില് 2024ലെ ലോക്സഭാ തിരഞ്ഞെടുപ്പ് ലക്ഷ്യമിട്ട് ബിജെപി നേതാക്കളെ കോണ്ഗ്രസിലെത്തിക്കാന് നീക്കം. ‘ഓപ്പറേഷന് ഹസ്ത’ എന്ന പദ്ധതിക്കാണ് കോണ്ഗ്രസ് രൂപം നല്കിയിരിക്കുന്നത്. മുതിര്ന്ന ബിജെപി നേതാക്കളെ കോണ്ഗ്രസിലേക്ക് എത്തിക്കുക എന്നതാണ് പദ്ധതിയുടെ ലക്ഷ്യം. ബിജെപി മുന്മന്ത്രിമാരായ എസ്.ടി. സോമശേഖര്, എം.ടി.ബി നാഗരാജ് എന്നിവര് കോണ്ഗ്രസുമായി കൈകോര്ക്കാന് സന്നദ്ധത പ്രകടിപ്പിച്ചതായാണ് റിപ്പോര്ട്ട്.
നേരത്തെ സംസ്ഥാനത്ത് ഓപ്പറേഷന് ലോട്ടസ് എന്ന പദ്ധതി ബിജെപി നടപ്പാക്കിയിരുന്നു. ഇതിന്റെ ഭാഗമായി കോണ്ഗ്രസില്നിന്നു ബിജെപിയിലെത്തിയ നേതാക്കളാണ് എസ്.ടി. സോമശേഖറും എം.ടി.ബി നാഗരാജും. നിലവില് യശ്വന്ത്പുരില്നിന്നുള്ള ബിജെപി എംഎല്എയാണ് സോമശേഖര്. ഉപമുഖ്യമന്ത്രി ഡി.കെ. ശിവകുമാറാണ് തന്റെ ഗുരു എന്ന് അടുത്തിടെ ഒരു പൊതുപരിപാടിയില് അദ്ദേഹം പറഞ്ഞിരുന്നു. രാഷ്ട്രീയത്തില് താന് എന്തുനേടിയിട്ടുണ്ടോ അതെല്ലാം ശിവകുമാറിന്റെ അനുഗ്രഹം കൊണ്ടാണെന്നും അദ്ദേഹം പറഞ്ഞു.
