ബെംഗലൂരു: കര്ണാടകത്തില് മിന്നുന്ന വിജയം നേടി കോണ്ഗ്രസ്. സംസ്ഥാനത്ത് ആകെയുള്ള 224 സീറ്റില് കേവലഭൂരിപക്ഷമായ 113 ഉം കടന്ന് 134 സീറ്റിലാണ് കോണ്ഗ്രസ് ലീഡ് ചെയ്യുന്നത്. ബിജെപി 65 സീറ്റിലേക്ക് താഴ്ന്നു. മുന് മുഖ്യമന്ത്രിയായ സിദ്ദരാമയ്യയ്ക്കും വമ്പന് ഭൂരിപക്ഷത്തോടെ ജയിച്ച ഡി കെ ശിവകുമാറിനും പിന്നില് എം എല് എ മാര് രണ്ടു ചേരി ആകാനാണ് സാധ്യത. ജയിച്ച മുഴുവന് ആളുകളും ഉടന് ബംഗളൂരുവില് എത്താന് പാര്ട്ടി നേതൃത്വം നിര്ദേശം നല്കിയിട്ടുണ്ട്.
ഇക്കുറി ആറ് ശതമാനം വോട്ടിന്റെ വര്ധനയാണ് കോണ്ഗ്രസിന് ഉണ്ടായത്. മൈസൂര് മേഖലയില് മാത്രം ആകെയുള്ള 61 സീറ്റില് 35 ഉം കോണ്ഗ്രസ് നേടി. ജെഡിഎസിന്റെ ശക്തികേന്ദ്രമായിരുന്നു ഇവിടം. മധ്യ കര്ണാടകയില് 25 ല് 16 സീറ്റും ഹൈദരാബാദ് കര്ണാടകയില് 41 ല് 23 സീറ്റും കോണ്ഗ്രസ് നേടി. വടക്കന് കര്ണാടകയില് അന്പതില് 32 സീറ്റില് കോണ്ഗ്രസ് ജയിച്ചു. തീര മേഖലയും ബംഗളൂരുവും ആണ് ബിജെപിക്ക് ഒപ്പം നിന്നത്.
