ബെംഗളൂരു: കര്‍ണാടകയിലെ ജനങ്ങള്‍ 40 ശതമാനം കമ്മീഷനില്‍ മടുത്തുവെന്നും വരാനിരിക്കുന്ന നിയമസഭാ തെരഞ്ഞെടുപ്പില്‍ കോണ്‍ഗ്രസ് പാര്‍ട്ടി അധികാരത്തില്‍ വന്നാല്‍ 100 ശതമാനം പ്രതിബദ്ധത ഉറപ്പാക്കുമെന്ന് കോണ്‍ഗ്രസ് നേതാവും എംപിയുമായ ശശി തരൂര്‍. കര്‍ണാടക മുഖ്യമന്ത്രി ബസവരാജ് ബൊമ്മൈയുടെ നേതൃത്വത്തിലുള്ള ബിജെപി സര്‍ക്കാരിനെതിരെ രൂക്ഷ വിമര്‍ശനമാണ് അദ്ദേഹം ഉന്നയിച്ചത്. കഴിഞ്ഞ നാല് വര്‍ഷമായി സംസ്ഥാനത്തെ ജനങ്ങള്‍ ദുര്‍ഭരണം അനുഭവിക്കുകയാണ്. ജനങ്ങള്‍ കോണ്‍ഗ്രസിനെ ബദലായി നോക്കികാണുകയാണെന്നും ശശി തരൂര്‍ പറഞ്ഞു.
ബെംഗളൂരുവിലും മുഴുവന്‍ കര്‍ണാടക സംസ്ഥാനത്തും ഭരണത്തിലെ ഗുരുതരമായ പോരായ്മകള്‍ പരിഹരിക്കാന്‍ കോണ്‍ഗ്രസ് തയ്യാറാണെന്നും അദ്ദേഹം പറഞ്ഞു. ബെംഗളൂരു നഗരത്തിന് വലിയ സാധ്യതകളുണ്ടെന്ന് നഗരവാസികള്‍ തിരിച്ചറിഞ്ഞു തുടങ്ങി. കുറച്ച് വര്‍ഷങ്ങള്‍ക്ക് മുമ്പ് വരെ ഈ നഗരം ഐടി നിക്ഷേപത്തിന് ഏറ്റവും ഇഷ്ടപ്പെട്ട സ്ഥലമായിരുന്നു. എന്നാല്‍ ഇപ്പോള്‍ കഴിഞ്ഞ 3-4 വര്‍ഷമായി നിക്ഷേപം കുറയുന്നത് ഖേദകരമാണെന്നും ശശി തരൂര്‍ പറഞ്ഞു.
