ബെംഗളൂരു : കേരളത്തില് നിന്നും എത്തുന്നവര്ക്ക് ഏഴു ദിവസത്തെ ക്വാറന്റെന് നിര്ബന്ധമാക്കി കര്ണാടക സര്ക്കാര്. രണ്ട് ഡോസ് വാക്സിന് സര്ട്ടിഫിക്കറ്റും കോവിഡ് നെഗറ്റീവ് സര്ട്ടിഫിക്കറ്റും ഇനി പരിഗണിക്കില്ല. കേരളത്തിലെ ഉയര്ന്ന ടെസ്റ്റ് പോസിറ്റിവിറ്റി നിരക്കാണ് നിയന്ത്രണങ്ങള് കടുപ്പിക്കാന് കര്ണാടക സര്ക്കാരിനെ പ്രേരിപ്പിച്ചത്.
ഏഴു ദിവസവും സര്ക്കാര് കേന്ദ്രങ്ങളില് ക്വാറന്റൈനില് കഴിയണം. എട്ടാം ദിവസം നടത്തുന്ന കോവിഡ് പരിശോധന ഫലം നെഗറ്റീവ് ആയാല് മാത്രമേ പുറത്തിറങ്ങാന് അനുവദിക്കൂ. കേരളവുമായി അതിര്ത്തി പങ്കിടുന്ന ജില്ലകളിലും നിയന്ത്രണങ്ങള് തുടരും. ദക്ഷിണ കന്നഡ, കൊടക് ജില്ലകളിലാണ് നിയന്ത്രണങ്ങള് തുടരുക. നേരത്തെ കേരളത്തില് നിന്നെത്തുന്നവര്ക്ക് ക്വാറന്റൈന് വേണമെന്ന് പറഞ്ഞിരുന്നുവെങ്കിലും അത് നിലവില് വന്നിരുന്നില്ല. അത് ഇപ്പോള് ഒന്നുകൂടി കര്ശനമാക്കുകയായിരുന്നു കര്ണാടക സര്ക്കാര്.
അതിനിടെ ടിപിആര് രണ്ട് ശതമാനത്തില് താഴെയുളള ജില്ലകളിലെ ആറു മുതല് എട്ട് വരെയുള്ള ക്ലാസുകള് കൂടി തുറക്കാനും കര്ണാടക സര്ക്കാര് തീരുമാനിച്ചു. ഓഗസ്റ്റ് 23 മുതല് ഒമ്പതു മുതല് 12 -ാം തരം വരെയുള്ള ക്ലാസുകള് ആരംഭിച്ചിരുന്നു.
കര്ണാടകയില് തിങ്കളാഴ്ച 973 കോവിഡ് കേസുകള് മാത്രമാണ് റിപ്പോര്ട്ട് ചെയ്തത്. ടിപിആര് 0.64% ആണ്. കര്ണാടകയില് നിലവില് ടെസ്റ്റ് പോസിറ്റിവിറ്റി നിരക്ക് ഒരു ശതമാനത്തില് താഴെയാണ്. 1500 ല് താഴെ കേസുകളാണ് ഇപ്പോള് സംസ്ഥാനത്തു റിപ്പോര്ട്ട് ചെയ്യപ്പെടുന്നത്.
