ദില്ലി : മുൻ കെപിസിസി പ്രസിഡന്റും കണ്ണൂർ എംപിയുമായ കെ സുധാകരൻ കോൺഗ്രസ് അധ്യക്ഷൻ മല്ലികാർജുൻ ഖാർഗെയെയും പ്രതിപക്ഷ നേതാവ് രാഹുൽ ഗാന്ധിയെയും ദില്ലിയിൽ നേരിൽ കണ്ടതിന് പിന്നാലെ പ്രതികരണവുമായി എഐസിസി ജനറൽ സെക്രട്ടറി കെ സി വേണുഗോപാൽ എംപി. കെ സുധാകരൻ അടിയുറച്ച കോൺഗ്രസുകാരനാണെന്നും പാർട്ടിയോടുള്ള അദ്ദേഹത്തിന്റെ അചഞ്ചലമായ കൂറും വിശ്വാസ്യതയും ആർക്കും ചോദ്യം ചെയ്യാനാവില്ലെന്നും കെ സി വേണുഗോപാൽ ഫേസ്ബുക്ക് പേജിൽ കുറിച്ചു.
സുധാകരനെ ബന്ധപ്പെടുത്തി വിവിധ കേന്ദ്രങ്ങളിൽ നടക്കുന്ന അനാരോഗ്യകരമായ ചർച്ചകൾക്കുള്ള മറുപടിയാണ് ഈ കൂടിക്കാഴ്ചയെന്നും വേണുഗോപാൽ വ്യക്തമാക്കി. പലവിധ താൽപ്പര്യങ്ങൾക്ക് വിധേയപ്പെട്ടുള്ള ഇത്തരം ചർച്ചകൾക്ക് ഇനി പ്രസക്തിയില്ല. എല്ലാ കാലത്തും പാർട്ടി അദ്ദേഹത്തിന്റെ സേവനങ്ങളെ വിലമതിക്കുന്നുണ്ട്. മരണം വരെ കെ സുധാകരൻ അടിമുടി കോൺഗ്രസായിരിക്കുമെന്നും ഇന്ത്യൻ നാഷണൽ കോൺഗ്രസ് അതിന്റെ ഹൃദയത്തോട് എക്കാലവും ചേർത്തുപിടിക്കുന്ന പേരുകളിൽ ഒന്നാണ് കെ സുധാകരൻ എന്നും കൂടിക്കാഴ്ച വ്യക്തമാക്കുന്നതായി കെ സി വേണുഗോപാൽ കുറിച്ചു.
