തിരുവനന്തപുരം : തലസ്ഥാനത്ത് കീം പരീക്ഷ (എന്‍ജിനിയറിംഗ്/ഫാര്‍മസി പ്രവേശന പരീക്ഷ) എഴുതിയ രണ്ട് വിദ്യാര്‍ത്ഥികള്‍ക്ക് കോവിഡ് സ്ഥിരീകരിച്ചതിന് തൊട്ടുപിന്നാലെ കോഴിക്കോട്ടും പ്രവേശന പരീക്ഷ എഴുതിയ വിദ്യാര്‍ത്ഥിക്ക് കോവിഡ്. മലബാര്‍ ക്രിസ്ത്യന്‍ കാേളേജില്‍ പരീക്ഷ എഴുതിയ ഒളവണ്ണ സ്വദേശിക്കാണ് കോവിഡ് സ്ഥിരീകരിച്ചത്. വിദ്യാര്‍ത്ഥിയുടെ അച്ഛനും കോവിഡ് സ്ഥിരീകരിച്ചിട്ടുണ്ട്. വിദേശത്തായിരുന്നു ഇദ്ദേഹം മാര്‍ച്ചിലാണ് നാട്ടിലെത്തിയത്. ഇവര്‍ക്ക് രോഗം പകര്‍ന്നത് എവിടെ നിന്നാണെന്ന് വ്യക്തമല്ല. വിദ്യാര്‍ത്ഥിക്കൊപ്പം പരീക്ഷ എഴുതിയവരോട് നിരീക്ഷണത്തില്‍പോകാന്‍ ആവശ്യപ്പെട്ടിട്ടുണ്ട്.
ഇന്നാണ് തിരുവനന്തപുരത്ത് പരീക്ഷ എഴുതിയ രണ്ട് വിദ്യാര്‍ത്ഥികള്‍ക്ക് രോഗം സ്ഥിരീകരിച്ചത്. ഒരു രക്ഷിതാവിനും രോഗം സ്ഥിരീകരിച്ചിട്ടുണ്ട്. തൈക്കാട് കേന്ദ്രത്തില്‍ പരീക്ഷ എഴുതിയ പൊഴിയൂര്‍ സ്വദേശിയായ വിദ്യാര്‍ത്ഥിക്കും കരമനയില്‍ എഴുതിയ കരകുളം സ്വദേശിയായ വിദ്യാര്‍ത്ഥിക്കുമാണ് രോഗം സ്ഥിരീകരിച്ചത്.കോട്ടണ്‍ഹില്‍ സ്കൂളില്‍ കുട്ടിയുമായി എത്തിയ മണക്കാട് സ്വദേശിയാണ് രാേഗം സ്ഥിരീകരിച്ച രക്ഷിതാവ്.
