തിരുവനന്തപുരം: ഗതാഗത നിയമ ലംഘനങ്ങള് കണ്ടെത്താനുള്ള ആര്ട്ടിഫിഷ്യല് ഇന്റലിജന്സ് ക്യാമറകള് വഴിയുള്ള ഗതാഗത പരിഷ്കാരത്തിനെതിരെ കെ പി സി സി പ്രസിഡന്റ് കെ സുധാകരന് എം പി രംഗത്ത്. ട്രാഫിക് നിയമങ്ങളെക്കുറിച്ച് യാതൊരുവിധ ബോധവത്കരണവും നടത്താതെ സര്ക്കാര് മുക്കിലും മൂലയിലും അനേകം ക്യാമറകള് സ്ഥാപിച്ച് ജനങ്ങളെ കുത്തിപ്പിഴിയാന് നടപ്പാക്കുന്ന ട്രാഫിക് പരിഷ്കാരം മാറ്റിവയ്ക്കണമെന്ന് കെ സുധാകരന് ആവശ്യപ്പെട്ടു. എ ഐ ക്യാമറകള് ഉപയോഗിച്ച് ആയിരം കോടി രൂപ സമാഹരിക്കാനാണ് സര്ക്കാര് ലക്ഷ്യമിടുന്നതത്രേ. ഈ രീതിയിലാണ് പദ്ധതി നടപ്പാക്കുന്നതെങ്കില് വണ്ടിയെടുത്തു പുറത്തുപോകുന്നവരൊക്കെ എല്ലാ ദിവസവും പിഴ അടയ്ക്കേണ്ടി വരും. ജനരോഷത്തിനു മുന്നില് സര്ക്കാരിനു തന്നെ പദ്ധതിയില്നിന്ന് പിന്മാറേണ്ടി വരും. നികുതിഭാരം കൊണ്ട് നടുവൊടിഞ്ഞു നില്ക്കുന്ന സാധാരണക്കാരന് ഈ പീഡനം സഹിക്കാവുന്നതിലപ്പുറമാണെന്നും സുധാകരന് ആരോപിച്ചു.
അതേസമയം ആര്ട്ടിഫിഷ്യല് ഇന്റലിജന്സില് അധിഷ്ഠിതമായി പ്രവര്ത്തിക്കുന്ന ക്യാമറകള് നാളെ മിഴി തുറക്കും. എന്നാല് സംസ്ഥാനത്ത് എഐ ക്യാമറകള് പ്രവര്ത്തനക്ഷമമാകുന്നതില് പൊതുജനങ്ങള്ക്ക് ആശങ്ക വേണ്ടെന്നും നിയമം ലംഘിക്കാതിരുന്നാല് മതിയെന്നും ഗതാഗത കമ്മീഷന് എസ്. ശ്രീജിത്ത് അറിയിച്ചു. മോട്ടോര് വാഹന വകുപ്പാണ് നോട്ടീസ് നല്കുന്നതും പിഴയീടാക്കുന്നതും. പിറകിലിരിക്കുന്നവര്ക്കൊപ്പമായിരിക്കണം കൈകുഞ്ഞുങ്ങള്. നിരത്തിലെ അപകട മരണം 20 ശതമാനം കുറക്കുകയാണ് ലക്ഷ്യം വെക്കുന്നതെന്നും ഗതാഗത കമ്മീഷന് വ്യക്തമാക്കി.
