കൊച്ചി: ക്യൂആര് കോഡുകള് സ്കാന് ചെയ്യുമ്പോള് ജാഗ്രത പുലര്ത്തിയില്ലെങ്കില് കെണിയില് വീഴാമെന്ന് കേരള പോലീസ് മുന്നറിയിപ്പ് നല്കി. ക്യൂആര് കോഡ് ഉപയോഗിച്ച് ഒരു ലിങ്ക് തുറക്കുമ്പോള്, URL സുരക്ഷിതമാണെന്നും വിശ്വസനീയമായ ഉറവിടത്തില് നിന്നാണ് വരുന്നതെന്നും ഉറപ്പാക്കേണ്ടത് പ്രധാനമാണ്. ക്യൂആര് കോഡുമായി ബന്ധപ്പെട്ട് ശ്രദ്ധിക്കേണ്ട കാര്യങ്ങള് കേരള പോലീസ് ഫെയ്സ്ബുക്കില് പങ്കുവെച്ചു.
ആധുനികജീവിതത്തില് ക്യൂആര് കോഡുകളുടെ സ്ഥാനം ഒഴിവാക്കാനാവാത്ത വിധം മാറിക്കഴിഞ്ഞു. ക്യൂആര് കോഡുകള് സ്കാന് ചെയ്യുമ്പോള് അറിഞ്ഞിരിക്കേണ്ട ചില വസ്തുതകള് ഉണ്ട്. ക്യൂആര് കോഡ് ഉപയോഗിച്ച് ഒരു ലിങ്ക് തുറക്കുമ്പോള്, URL സുരക്ഷിതമാണെന്നും വിശ്വസനീയമായ ഉറവിടത്തില് നിന്നാണ് വരുന്നതെന്നും ഉറപ്പാക്കേണ്ടത് പ്രധാനമാണ്. ഇമെയിലിലെയും എസ്എംഎസിലെയും സംശയകരമായ ലിങ്കുകള് ക്ലിക്കുചെയ്യുന്നത് അപകടകരമെന്നതുപോലെ ക്യൂആര് കോഡുകള് നയിക്കുന്ന URLകള് എല്ലാം ശരിയാകണമെന്നില്ല. ഫിഷിംഗ് വെബ്സൈറ്റിലേക്ക് നിങ്ങളെ കൊണ്ടുപോകാന് അതിനു കഴിഞ്ഞേക്കും. ക്യൂആര് കോഡ് സ്കാനര് APP സെറ്റിംഗ്സില് ‘open URLs automatically’ എന്ന ഓപ്ഷന് നമ്മുടെ യുക്താനുസരണം സെറ്റ് ചെയ്യാം. നമ്മുടെ അറിവോടെ വെബ്സൈറ്റുകളില് പ്രവേശിക്കാനുള്ള അനുമതി നല്കുന്നതാണ് ഉചിതം. അറിയപ്പെടുന്ന സേവന ദാതാക്കളില് നിന്ന് മാത്രം ക്യൂആര് കോഡ് ജനറേറ്റ് ചെയ്യുക. ക്യൂആര് കോഡ് ഉപയോഗിച്ചുള്ള ഇടപാടുകള് നടത്തിയ ഉടനെ അക്കൗണ്ടിലെ ട്രാന്സാക്ഷന് വിശദാംശങ്ങള് പരിശോധിച്ച് ഉറപ്പുവരുത്തുക. കസ്റ്റം ക്യൂആര് കോഡ് ആപ്പുകള് ഡൗണ്ലോഡ് ചെയ്യുന്നത് ഒഴിവാക്കുക.
