തിരുവനന്തപുരം : ഇന്ത്യൻ യൂണിയന്റെ തെക്ക് പടിഞ്ഞേറെ അറ്റത്തുള്ള ഒരു കൊച്ചു പ്രദേശമായ കേരളത്തിന് നിരവധി ചരിത്ര നേട്ടങ്ങൾ പറയാനുണ്ട്. അതിൽ എക്കാലവും ഓർമിപ്പിക്കപ്പെടുന്ന ഒന്നാണ് കായിക മേഖല. ഇന്ന് സംസ്ഥാനം കായിക ദിനമായി ആചരിക്കുമ്പോൾ നാം മറന്നു കൂടാത്ത ഒരു പേര് കൂടിയുണ്ട്. ലെഫ്റ്റനന്റ് കേണൽ പിആർ ഗോദവർമ രാജ എന്ന ജിവി രാജ. അദ്ദേഹത്തിന്റെ ജന്മദിനമായ ഒക്ടോബർ 13ആം തീയതിയാണ് സംസ്ഥാനം കായിക ദിനമായി ആചരിക്കുന്നത്.
കേരളത്തെ ലോകത്തിന്റെ കായിക ഭൂപടത്തിൽ അടയാളപ്പെടുത്തിയ നേട്ടങ്ങളിലേക്ക് വിത്തുപാകിയ വ്യക്തിയായിരുന്നു ജിവി രാജ. കേരള സ്പോർട്സ് കൗൺസിലിന്റെ സ്ഥാപകനും ആജീവനാന്ത പ്രസിഡന്റുമായിരുന്ന ജിവി രാജ കായിക മേഖലയ്ക്ക് നൽകിയ സംഭാവനകൾ വിലമതിക്കാൻ ആവാത്തതാണ്. കേരളത്തിൽ നിന്നുള്ള ആദ്യ ബിസിസിഐ ഭാരവാഹിയായിരുന്നു അദ്ദേഹം. ട്രിവാൻഡ്രം ടെന്നീസ് ക്ലബ്, ഗോൾഫ് ക്ലബ് കമ്മിറ്റി, ട്രാവൻകൂർ സ്പോർട്സ് കൗൺസിൽ, വേളി ബോട്ട് ക്ലബ് എന്നിവ സ്ഥാപിച്ചതും ജിവി രാജയായിരുന്നു.
എണ്ണമറ്റ ഒളിമ്പ്യൻമാരെയും, ലോകോത്തര നിലവാരമുള്ള അത്ലറ്റുകളെയും സംഭാവന ചെയ്തിട്ടുള്ള കേരളത്തിന് അതിലേക്കുള്ള വഴി തെളിച്ചത് സ്പോർട്സ് കൗൺസിൽ സ്ഥാപിച്ചതിലൂടെ ജിവി രാജയെന്ന അതികായൻ ആയിരുന്നു. മരണം വരെ സ്പോര്ട്സ് കൗൺസിൽ പ്രസിഡന്റായി അദ്ദേഹം പ്രവർത്തിച്ചിരുന്നു. 1971ല് ഇന്ത്യൻ സ്പോര്ട്സ് കൗണ്സിലിന്റെ മീറ്റിംഗില് പങ്കെടുക്കാനായി പട്യാലയിലേക്ക് പോയ അദേഹം ഏപ്രില് 30ന് കുളു താഴ്വരയില് വച്ചുണ്ടായ വിമാനാപകടത്തിലാണ് മരിച്ചത്.
ആദ്യ കാലങ്ങളിൽ അത്ലറ്റിക്സ് പോലെയുള്ള താരതമ്യേന ജനകീയമല്ലാത്ത ഇനങ്ങളിൽ ശ്രദ്ധ കേന്ദ്രീകരിച്ചിരുന്ന കേരളം പിന്നീട് കഴിഞ്ഞ ദശകങ്ങളിൽ ഫുട്ബോളും, വോളിബോളും ഉൾപ്പെടെയുള്ള ഇനങ്ങൾക്കും പ്രാധാന്യം നൽകിയതോടെ നേട്ടങ്ങൾ അനവധിയാണ്. എങ്കിലും കേരള കായിക ചരിത്രത്തിലെ അജയ്യനായ ജിവി രാജയുടെ പേര് എന്നും ഓർമ്മിക്കപ്പെടും. കേവലം ഒരു ദിനത്തിന്റെ പേരിലല്ല, മറിച്ച് കായിക മേഖലയെ ജനകീയമാക്കിയ വ്യക്തിയെന്ന നിലയിലാവും അദ്ദേഹം ജനമനസുകളിൽ തുടരുക.
