കൊച്ചി: കൊച്ചിയില് ദി കേരള സ്റ്റോറി എന്ന സിനിമയുടെ പ്രദര്ശനം നടന്നു. ക്ഷണിക്കപ്പെട്ട അതിഥികള്ക്കായി എറണാകുളം ഷേണായീസ് തീയേറ്ററിലാണ് പ്രദര്ശനം നടന്നത്. ബിജെപി നേതാക്കള് ഉള്പ്പെടെ സിനിമ കണ്ടു. ഇന്ന് വൈകീട്ട് നാല് മണിയോടെയാണ് പ്രിവ്യൂ നടന്നത്. ബിജെപി ജില്ലാ പ്രസിഡന്റ് അഡ്വ ഷൈജു കെ എസ് ഉള്പ്പെടെയുള്ളവര് സിനിമ കണ്ടു. ഷിബു തിലകന് ഉള്പ്പെടെയുള്ള അതിഥികളും സിനിമ കാണാനായെത്തി. സിനിമയുടെ അണിയറ പ്രവര്ത്തകര് ആവശ്യപ്പെട്ട പ്രകാരമാണ് കൊച്ചിയില് പ്രിവ്യൂ ഷോ ഒരുക്കിയതെന്നാണ് തിയേറ്റര് അധികൃതര് പറയുന്നത്.
അതേസമയം ദി കേരള സ്റ്റോറി എന്ന സിനിമയ്ക്കെതിരായ ഹര്ജി പരിഗണിക്കാന് സുപ്രീം കോടതി വിസമ്മതിച്ചു. ഹര്ജിക്കാര്ക്ക് കേരള ഹൈക്കോടതിയെ സമീപിക്കാമെന്ന് കോടതി വ്യക്തമാക്കി. മെയ് 5 ന് ചിത്രം റിലീസ് ചെയ്യാന് പോകുകയാണ്. അതിനാല് അടിയന്തര വാദം കേള്ക്കാന് ഹൈക്കോടതിയെ സമീപിക്കാം. ‘ദി കേരള സ്റ്റോറി’ നിരോധിക്കണമെന്ന ആവശ്യവും ഉയര്ന്നിട്ടുണ്ട്. ‘എല്ലാ കേസിലും പ്രതിവിധിയായി സുപ്രീം കോടതിക്ക് വരാനാകില്ല. ഇക്കാര്യത്തില് ഹൈക്കോടതിയെ സമീപിക്കാം. ഇവിടെ നമുക്ക് ഒരു സൂപ്പര് ഹൈക്കോടതി ആകാന് കഴിയില്ല.’, ഹര്ജി പരിഗണിക്കാന് വിസമ്മതിച്ച് കോടതി പറഞ്ഞു.