അടൂര് : അടൂര് നഗരസഭ പരിധിയില് ഒരാഴ്ചക്കിടെ അഞ്ച് പേര് തെരുവ് നായയുടെ ആക്രമണത്തിന് ഇരയായിട്ടും നടപടി സ്വീകരിക്കാതെ അടൂര് നഗരസഭ. കരുവാറ്റയില് സ്കൂട്ടറില് യാത്ര ചെയ്ത അമ്മയെയും രണ്ട് മക്കളെയും തെരുവ് നായ ക്രൂരമായിആക്രമിച്ച് പരിക്കേല്പ്പിച്ചതാണ് അവസാനത്തെ സംഭവം. കഴിഞ്ഞ മൂന്ന് ദിവസങ്ങള്ക്ക് മുന്പാണ് അടൂര് കെ.എസ്.ആര്.റ്റി.സി ബസ് സ്റ്റാന്റിന് സമീപം കപ്പലണ്ടി കച്ചവടം നടത്തുന്ന തമിഴ്നാട് സ്വദേശിയായ മുരുകനെ തെരുവുനായ ആക്രമിക്കുകയും കാലിന് ഗുരുതരമായി പരിക്കേല്ക്കുകയും ചെയ്തത്. രാത്രി എട്ടുമണിയോടെ കപ്പലണ്ടി വറുത്തുകൊണ്ടിരുന്ന മുരുകന്റെ പുറകില് നിന്നും എത്തിയ നായ കാലില് കടിച്ച് മുറിവേല്പ്പിക്കുകയായിരുന്നു. ഇതിന് മുന്പ് കെ.എസ്.ആര്.റ്റി.സി ബസ് സ്റ്റാന്റിലെത്തിയ പ്രായമായ സ്ത്രീക്കും നായയുടെ ആക്രമണത്തില് പരിക്കേറ്റിരുന്നു.
അടൂര് നഗരത്തില് ഏറെ നാളുകളായി ജനങ്ങള്ക്ക് നേരെ തെരുവ് നായകളുടെ ആക്രമണം തുടര്ന്നിട്ടും യാതൊരു നടപടിയും സ്വീകരിക്കാന് അടൂര് നഗരസഭയ്ക്ക് കഴിഞ്ഞിട്ടില്ല. നഗരത്തില് കൂട്ടമായി അലഞ്ഞുതിരിയുന്ന തെരുവ് നായകള് അടൂരില് എത്തുന്നവര്ക്ക് വലിയ ഭീഷണിയായി മാറുകയാണ്. തെരുവ് നായകള്ക്ക് അനധികൃതമായി കോഴിമാലിന്യങ്ങള് ഉള്പ്പെടെ നല്കുന്നതും നായ ശല്യം വര്ധിക്കുന്നതിന് കാരണമായി തീരുന്നുണ്ട്. കുറച്ച് ദിവസങ്ങള്ക്ക് മുന്പ് ഇത്തരത്തില് അടൂര് നഗരത്തില് തെരുവ് നായകള്ക്ക് അനധികൃതമായി ഭക്ഷണം നല്കിയ സ്ത്രീയെ നാട്ടുകാരും സന്നദ്ധ പ്രവര്ത്തകരും ചേര്ന്ന് പിടികൂടി പോലീസിന് കൈമാറിയിരുന്നു.
