തിരുവനന്തപുരം: ഹിന്ദി ചിത്രമായ കേരള സ്റ്റോറി സിനിമ ബഹിഷ്കരിക്കണമെന്ന് സാംസ്കാരിക വകുപ്പ് മന്ത്രി സജി ചെറിയാന്. കേരളത്തിലെ 32000 വനിതകളെ ഐ എസ് ഐ എസില് റിക്രൂട്ട് ചെയ്തെന്നാണ് ബംഗാള് സിനിമയായ കേരള സ്റ്റോറിയില് പറയുന്നത്. കേരള സമൂഹത്തെ വര്ഗ്ഗീയവല്ക്കരിക്കാനുള്ള സംഘപരിവാര് ഗൂഡാലോചന പിന്നിലുണ്ടെന്നും സജി ചെറിയാന് പറഞ്ഞു. സിനിമയെ കേരള സമൂഹം ഒന്നാകെ ബഹിഷ്കരിക്കണം. നിയമ നടപടിക്കുള്ള സാധ്യതയും പരിശോധിക്കും. എല്ലാ മതസ്ഥരും ഒന്നിച്ച് ജീവിക്കുന്ന കേരളത്തെ കലാപ ഭൂമിയാക്കാന് നീക്കം നടക്കുന്നുവെന്നും മന്ത്രി പറഞ്ഞു. സുദീപ്തോ സെന് ആണ് ചിത്രം സംവിധാനം ചെയ്തിരിക്കുന്നത്. ചിത്രത്തിന്റെ ട്രെയിലര് പുറത്തിറങ്ങിയപ്പോഴാണ് കേരളത്തിനെതിരെ കള്ളങ്ങള് പ്രചരിപ്പിക്കുന്നതായി ശ്രദ്ധയില്പ്പെടുന്നത്.
അതേസമയം ‘ദ കേരള സ്റ്റോറി’ക്കെതിരെ പ്രതിപക്ഷ നേതാവ് വി.ഡി സതീശനും രംഗത്തെത്തിയിരുന്നു. കേരളത്തിലെ 32,000 സ്ത്രീകളെ മതം മാറ്റി ഇസ്ലാമിക് സ്റ്റേറ്റില് അംഗങ്ങളാക്കിയെന്ന പച്ചക്കള്ളം പറയുന്ന ‘ദ കേരള സ്റ്റോറി’ എന്ന സിനിമയ്ക്ക് പ്രദര്ശനാനുമതി നല്കരുതെന്നും വി.ഡി സതീശന് പറഞ്ഞു. ഇത് ആവിഷ്കാര സ്വാതന്ത്ര്യത്തിന്റെ പ്രശ്നമല്ല. ന്യൂനപക്ഷ വിഭാഗങ്ങളെ സംശയനിഴലിലാക്കി സമൂഹത്തില് വിഭാഗീയതയും ഭിന്നിപ്പും സൃഷ്ടിക്കുകയെന്ന സംഘപരിവാര് അജണ്ട നടപ്പാക്കാനുള്ള ശ്രമത്തിന്റെ ഭാഗമാണെന്ന് വി.ഡി സതീശന് ഫേസ് ബുക്കില് കുറിച്ചു.
