ബെംഗളൂരു : നാട്ടിലേക്കുള്ള ട്രെയിനുകളിൽ ഇന്നലെയും വൻ തിരക്ക്. മൈസൂരു-കൊച്ചുവേളി ട്രെയിനിൽ മുഴുവൻ ടിക്കറ്റുകളും കന്യാകുമാരി എക്സ് പ്രസ്സിലെ 75% ടിക്കറ്റുകളും ഇന്നലെ വൈകുന്നേരത്തിനു മുമ്പേ വിറ്റഴിഞ്ഞിരുന്നു. സംസ്ഥാനാന്തര റൂട്ടിൽ ബസുകളും സ്വകാര്യ വാഹനങ്ങളും നിരോധിച്ചതാണ് ലോക്ക് ഡൗണിന് മുമ്പ് കേരളത്തിലേക്കുള്ള അവസാന ട്രെയിനുകളിലും തിരക്കു കൂടാൻ കാരണം.
അടിയന്തിരഘട്ടത്തിൽ ഉപയോഗിക്കാൻ കേരള ആർടിസി ബെംഗളൂരുവിൽ 3 ബസ് ഏർപ്പെടുത്തിയിരുന്നെങ്കിലും ഡ്രൈവർമാർ നാട്ടിലേക്കു മടങ്ങിയതിനാൽ ഇന്നലെ സർവീസ് നടത്തിയില്ല. ലോക്ക് ഡൗൺ ആണെങ്കിലും ബെംഗളൂരുവിൽനിന്നുള്ള കന്യാകുമാരി, കൊച്ചുവേളി ട്രെയിനുകൾ റദ്ദാക്കിയിട്ടില്ല. എറണാകുളം ഇന്റർസിറ്റി ഉൾപ്പെടെ ഇന്നു പുറപ്പെടുന്ന 3 ട്രെയിനുകളിലുമായി ആയിരത്തിലേറെ ടിക്കറ്റുകൾ ശേഷിക്കുന്നുണ്ട്. യാത്രക്കാർ കുറവായതിനാൽ എറണാകുളം ഇന്റർസിറ്റി നാളെ മുതൽ അനിശ്ചിത കാലത്തേക്കു സർവീസ് നിർത്തിവെയ്ക്കും.