തിരുവനന്തപുരം: 2023ലെ ദേശീയ പഞ്ചായത്ത് അവാര്ഡുകളില് കേരളത്തിന് 4 പുരസ്കാരങ്ങള്. തദ്ദേശ സ്വയംഭരണ വകുപ്പ് മന്ത്രി എം.ബി രാജേഷാണ് ഫേസ്ബുക്കിലൂടെ ഇക്കാര്യം അറിയിച്ചത്. കേന്ദ്രസര്ക്കാര് സുസ്ഥിര വികസന ലക്ഷ്യങ്ങള് (എസ് ഡി ജി) പ്രകാരം ഒന്പത് സൂചികകളുടെ അടിസ്ഥാനത്തിലാണ് പുരസ്കാരത്തിനായി വിലയിരുത്തല് നടത്തിയത്. രാജ്യത്തെ മികച്ച ശിശുസൗഹൃദ പഞ്ചായത്തായി ആലപ്പുഴയിലെ ചെറുതന ഗ്രാമപഞ്ചായത്ത് തെരഞ്ഞെടുക്കപ്പെട്ടു.
അടിസ്ഥാന സൗകര്യങ്ങളിലെ സ്വയം പര്യാപ്തതയുടെ കാര്യത്തില് ആലപ്പുഴയിലെ വീയപുരം ഗ്രാമപഞ്ചായത്ത് രാജ്യത്ത് ഒന്നാം സ്ഥാനത്തെത്തി. ജലപര്യാപ്തതയ്ക്ക് വേണ്ടി നടത്തിയ പ്രവര്ത്തനങ്ങള്ക്ക് മലപ്പുറം പെരുമ്പടപ്പ ഗ്രാമപഞ്ചായത്ത് രണ്ടാം സ്ഥാനം നേടി. സല്ഭരണ വിഭാഗത്തില് തൃശൂര് അളഗപ്പ നഗര് പഞ്ചായത്ത് മൂന്നാം സ്ഥാനം സ്വന്തമാക്കിയതായും മന്ത്രി അറിയിച്ചു. പുരസ്കാരങ്ങള് ഏപ്രില് 17-ന് ദില്ലി വിഗ്യാന് ഭവനില് നടക്കുന്ന ചടങ്ങില് വിതരണം ചെയ്യും.
