ടെഹ്റാൻ : ഇറാൻ പരമോന്നത നേതാവ് അയത്തൊള്ള അലി ഖമനേയിയുടെ ഫേസ്ബുക്ക്, ഇൻസ്റ്റഗ്രാം അക്കൗണ്ടുകൾ സസ്പെൻഡ് ചെയ്തെതായി മെറ്റ അറിയിച്ചു. ഉള്ളടക്ക നയങ്ങൾ ലംഘിച്ചതിനെ തുടർന്നാണ് നടപടി. ഒക്ടോബർ 7ന് ഇസ്രയേലിലുണ്ടായ ഭീകരാക്രമണത്തിന് പിന്നാലെ ഹമാസിനെ അനുകൂലിച്ചുള്ള പോസ്റ്റുകളുടെ പേരിൽ ഖമനേയിയുടെ അക്കൗണ്ടുകൾ നിരോധിക്കാൻ മെറ്റയ്ക്ക് മേൽ സമ്മർദ്ദം ഉയർന്നിരുന്നു.
അതേസമയം, അക്കൗണ്ടുകൾ നീക്കം ചെയ്യുന്നതായുള്ള പ്രസ്താവനയിൽ മെറ്റ കാരണം വ്യക്തമാക്കിയിട്ടില്ല. കഴിഞ്ഞ 35 വർഷമായി ഇറാനിൽ അധികാരത്തിലുള്ള ഖമനേയിയുടെ പേർഷ്യൻ ഭാഷയിലെ ഇൻസ്റ്റഗ്രാം അക്കൗണ്ടിൽ 50 ലക്ഷം ഫോളോവേഴ്സുണ്ട്. 2019ലും ഖമനേയിയുടെ പേരിലെ ഇൻസ്റ്റഗ്രാം അക്കൗണ്ടുകൾ സസ്പെൻഡ് ചെയ്തിരുന്നെങ്കിലും പിന്നീട് പുനഃസ്ഥാപിച്ചു. ഫേസ്ബുക്ക്, ഇൻസ്റ്റഗ്രാം തുടങ്ങിയ സോഷ്യൽ മീഡിയ പ്ലാറ്റ്ഫോമുകൾക്ക് ഇറാനിൽ നിരോധനമുണ്ടെങ്കിലും വി.പി.എൻ വഴി ഉപഭോക്താക്കൾ ഈ നിയന്ത്രണം മറികടക്കുന്നു.
