തിരുവനന്തപുരം: വ്യാപാരിയെ കൈവിലങ്ങിട്ട് തട്ടിക്കൊണ്ടുപോയ കേസില് പ്രതികളായ പോലീസുകാരെ പിരിച്ചുവിട്ടു. വിനീത്, കിരണ് എന്നിവരെയാണ് പിരിച്ചുവിട്ടത്. റൂറല് എസ് പി ഡി ശില്പ്പയാണ് ഇരുവര്ക്കുമെതിരെ നടപടിയെടുത്തത്. കാട്ടാക്കടയില് പണത്തിന് വേണ്ടി വ്യാപാരിയായ മുജീബിനെ കൈവിലങ്ങണിയിച്ച് തട്ടികൊണ്ടുപോകാന് ശ്രമിച്ചത് പോലീസുകാരും സുഹൃത്തും ചേര്ന്നാണെന്ന് കണ്ടെത്തിയിരുന്നു.
കഴിഞ്ഞ ശനിയാഴ്ച രാത്രി കാട്ടാക്കടയിലെ സ്ഥാപനം പൂട്ടി കാറില് പോവുകയായിരുന്ന മുജീബിനെ പോലീസ് യൂണിഫോം അണിഞ്ഞെത്തിയ രണ്ടുപേര് വാഹനം തടഞ്ഞ് ബന്ദിയാക്കുകയായിരുന്നു. വാഹനത്തിനുള്ളില് കയറി പോലീസ് യൂണിഫോമിട്ടവര് വിലങ്ങ് വച്ച് മുജീവിനെ സ്റ്റിയറിഗിനൊപ്പം ബന്ധിപ്പിച്ചു. മുജീബ് ബഹളം വച്ചപ്പോഴാണ് പോലീസ് വേഷധാരികള് കാറില് രക്ഷപ്പെട്ടത്. തട്ടിക്കൊണ്ടുപോകാന് ശ്രമിച്ചത് പോലീസുകാരാണെന്നും മാസ്ക്ക് ധരിച്ചുവെന്നുമാത്രമായിരുന്നു മുജീബിന്റെ മൊഴി. ഇതേതുടര്ന്ന് നടത്തിയ അന്വേഷണത്തിലാണ് പ്രതികള് കുടുങ്ങിയത്.
