കൊല്ലം: ഓയൂരിൽ ആറുവയസ്സുകാരിയെ തട്ടിക്കൊണ്ടുപോയ സംഭവത്തിൽ പ്രതികളെ കുടുക്കിയ ’റിയൽ ഹീറോ’ രംഗത്തുവന്നേക്കുമെന്ന് സൂചന. പ്രതി അനിതാകുമാരിയുടെ ശബ്ദം തിരിച്ചറിഞ്ഞ് പോലീസിന് വിവരം നൽകിയത് ഈ വനിതയായിരുന്നു. തുടർന്ന് പ്രതികളിലേക്ക് പോലീസിന് വേഗം എത്തിച്ചേരാനായി. ഇവരുടെ മൊഴി കഴിഞ്ഞദിവസം അന്വേഷണസംഘം രേഖപ്പെടുത്തി.
അനിതാകുമാരിയുടെ പരിചയക്കാരിയാണ് ഈ വനിത. ഇവർ തമ്മിൽ സാമ്പത്തിക ഇടപാടുകൾ ഉണ്ടായിരുന്നു. ഇവർ ആരാണെന്ന് പോലീസ് വെളിപ്പെടുത്തിയിട്ടില്ല. തത്കാലം സാക്ഷിപ്പട്ടികയിലും ഉൾപ്പെടുത്തില്ല. എന്നാൽ വിചാരണവേളയിൽ ആവശ്യമായിവന്നാൽ ഇവരെ അവതരിപ്പിക്കാനാണ് തീരുമാനം.
