തിരുവനന്തപുരം : ഗവ.മെഡിക്കല് കോളജില് വൃക്ക മാറ്റിവയ്ക്കല് ശസ്ത്രക്രിയ നടത്തിയ രോഗി മരിച്ച സംഭവം അന്വേഷിക്കാന് വിദഗ്ധ സമിതിയെ ഉടന് നിയോഗിക്കില്ല. ആരോഗ്യ വകുപ്പ് അഡീഷനല് ചീഫ് സെക്രട്ടറി ആശ തോമസിന്റെ അന്തിമ അന്വേഷണ റിപ്പോര്ട്ട് ലഭിച്ച ശേഷം മാത്രമാകും ഇക്കാര്യത്തില് സര്ക്കാര് തീരുമാനമെടുക്കുക. ആശ തോമസിന്റെ അന്വേഷണം ഇന്ന് ആരംഭിക്കും. ഡോക്ടര്മാര് ഉള്പ്പെട്ട വിദഗ്ധ സമിതിയെ നിയോഗിച്ച് സമഗ്ര അന്വേഷണം വേണമെന്ന് കേരള ഗവ. മെഡിക്കല് കോളജ് ടീച്ചേഴ്സ് അസോസിയേഷനും (കെജിഎംസിടിഎ) പ്രതിപക്ഷവും ആവശ്യപ്പെട്ടിരുന്നു. എന്നാല്, അഡീഷനല് ചീഫ് സെക്രട്ടറിയുടെ അന്തിമ റിപ്പോര്ട്ട് വരട്ടെ എന്ന നിലപാടിലാണ് ആരോഗ്യ വകുപ്പ്.
പ്രാഥമിക അന്വേഷണ റിപ്പോര്ട്ടില് വൃക്ക മാറ്റിവയ്ക്കല് ശസ്ത്രക്രിയയുടെ ഏകോപന ചുമതലയില് വീഴ്ച സംഭവിച്ചു എന്ന പരാമര്ശത്തെ തുടര്ന്നാണു രണ്ടു വകുപ്പ് മേധാവികളെ സസ്പെന്ഡ് ചെയ്യാന് മന്ത്രി വീണാ ജോര്ജ് നിര്ദേശിച്ചത്. വകുപ്പു മേധാവികള് സ്ഥലത്തില്ലാതിരുന്നതിനെയും റിപ്പോര്ട്ടില് കുറ്റപ്പെടുത്തിയിരുന്നു. യൂറോളജി വിഭാഗം മേധാവി ഡോ.എസ്.വാസുദേവന് പോറ്റി, നെഫ്രോളജി വിഭാഗം മേധാവി ഡോ.ജേക്കബ് ജോര്ജ് എന്നിവരുടെ സസ്പെന്ഷന് ഉത്തരവ് ഇന്നലെ ആരോഗ്യ പ്രിന്സിപ്പല് സെക്രട്ടറി പുറത്തിറക്കി. സസ്പെന്ഷനില് പ്രതിഷേധിച്ച് കെജിഎംസിടിഎയുടെ നേതൃത്വത്തില് ഡോക്ടര്മാര് മെഡിക്കല് കോളജ് ഒപിക്കുമുന്നില് ധര്ണ നടത്തി.
അതേസമയം, ഞായറാഴ്ച വൃക്ക മാറ്റിവയ്ക്കല് ശസ്ത്രക്രിയയ്ക്കു വിധേയനാവുകയും തിങ്കളാഴ്ച മരിക്കുകയും ചെയ്ത കാരക്കോണം സ്വദേശി സുരേഷ് കുമാറിന്റെ (62) മരണത്തിലെ ദുരൂഹത സംബന്ധിച്ച കേസ് ഇനി കഴക്കൂട്ടം അസി.കമ്മിഷണര് സി.എസ്.ഹരി അന്വേഷിക്കും. നിലവില് മെഡിക്കല് കോളജ് പോലീസിനാണ് അന്വേഷണച്ചുമതല.
