പത്തനംതിട്ട: നിയമസഭാ അംഗമെന്ന നിലയിൽ വിശുദ്ധി വരിച്ച ജനപ്രതിനിധിയാണ് കെ.കെ നായരെന്ന് മന്ത്രി വീണാ ജോർജ്ജ് പറഞ്ഞു. കെ കെ നായരുടെ 95ാം ജന്മദിനാചരണം പത്തനംതിട്ടയിൽ ഉദ്ഘാടനം ചെയ്ത് സംസാരിക്കുകയായിരുന്നു അവർ. കെ.കെ നായർ ചെയ്ത വികസനങ്ങൾ ജനങ്ങള് മറന്നു പോയിട്ടില്ല എന്നതിന്റെ ഉദാഹരണമാണ് കേരളജനവേദി പോലുള്ള സംഘടനകൾ അദ്ദേഹത്തെ ഓർക്കുന്നതെന്നും വീണാ ജോര്ജ്ജ് പറഞ്ഞു. പത്തനംതിട്ട നഗരസഭ പതിനാറാം വാർഡിൽ ആനപ്പാറ- ജുമാ മസ്ജിദ് – മുക്കുഴി പാലം വഴി – പുതിയ പ്രൈവറ്റ് ബസ് സ്റ്റാൻഡിലേക്കുള്ള റോഡിന് കെ.കെ നായരുടെ നാമകരണം നൽകണമെന്നുള്ള ജനവേദിയുടെ ആവശ്യം സ്വാഗതാർഹമാണ്. ഈ റോഡിന്റെ നിർമ്മാണത്തിന് എംഎൽഎ ഫണ്ടിൽ നിന്നും തുക അനുവദിക്കുമെന്നും അവർ പറഞ്ഞു.
കേരള ഹൈക്കോടതി മുൻ ജഡ്ജ് ജസ്റ്റിസ് എം.ആർ. ഹരിഹരൻ നായർ മുഖ്യപ്രഭാഷണം നടത്തി. കേരള ജനവേദി സംസ്ഥാന പ്രസിഡണ്ട് റഷീദ് ആനപ്പാറ അധ്യക്ഷത വഹിച്ചു. ജില്ലാ പഞ്ചായത്ത് വൈസ് പ്രസിഡണ്ട് അനീഷ് വരിക്കണ്ണാമല, പത്തനംതിട്ട നഗരസഭ കൗൺസിലർമാരായ അംബിക വേണു, ആൻസർ മുഹമ്മദ്, ബിബിൻ ബേബി, ജില്ലാ പഞ്ചായത്ത് മുൻ വൈസ് പ്രസിഡന്റ് ജോർജ് മാമ്മൻ കൊണ്ടുർ, പത്തനംതിട്ട നഗരസഭ മുൻ വൈസ് ചെയർമാൻ പി കെ ജേക്കബ്, അലങ്കാർ അഷറഫ്, ജോർജ് വർഗീസ് തെങ്ങുംതറയിൽ, ഷബീർ അഹമ്മദ്, ദിനേശ്.ബി.നായർ, റ്റി.വി. മിത്രൻ, കെ.ആർ. അശോക് കുമാർ, ശശികുമാർ തുരുത്തിയിൽ എന്നിവർ പ്രസംഗിച്ചു.
