കോഴിക്കോട്: നിയമസഭയിലെ തന്റെ പരാമര്ശം തെറ്റിദ്ധരിപ്പിക്കുന്ന തരത്തില് പ്രചരിക്കുന്നതിനിടെ വിശദീകരണവുമായി മുന് മന്ത്രി കെ.കെ.ശൈലജ. ജലീലിനെതിരാണെന്ന ആക്ഷേപം കഴമ്പില്ലാത്തതും ദുരുപദിഷ്ടവുമാണെന്നും മുന് മന്ത്രി സജി ചെറിയാനോട് പറഞ്ഞ ഒരു വാചകം തെറ്റിദ്ധരിപ്പിക്കുന്ന തരത്തില് പ്രചരിപ്പിക്കപ്പെടുന്നത് ഖേദകരമാണെന്നും ശൈലജ ഫേസ്ബുക്കില് കുറിച്ചു.
കെ.കെ. ശൈലജയാണ് ലോകായുക്ത നിയമഭേദഗതി ബില് സബ്ജക്ട് കമ്മിറ്റിക്ക് അയക്കാനുള്ള പ്രമേയം ഇന്ന് നിയമസഭയില് അവതരിപ്പിച്ചത്. ശൈലജയുടെ പ്രസംഗത്തിനിടെ കെ.ടി. ജലീല് ഒരു ചോദ്യം ഉന്നയിച്ച് എഴുന്നേറ്റു. ജലീലിന് ചോദ്യം ചോദിക്കാന് അനുവദിച്ച് സീറ്റില് ഇരിക്കവെ ‘ഇയാള് കുഴപ്പത്തിലാക്കുമോ’ എന്ന ആത്മഗതം ശൈലജ നടത്തിയത്. ശൈലജയുടെ ഈ പരാമര്ശം ജലീലിനെതിരെയാണെന്ന തരത്തില് പ്രചരിച്ചിരുന്നു. ഈ സാഹചര്യത്തിലാണ് ഫേസ്ബുക്ക് പോസ്റ്റിലൂടെ വിശദീകരണവുമായി ശൈലജ രംഗത്തെത്തിയത്.
കെ.കെ. ശൈലജയുടെ ഫേസ്ബുക്ക് പോസ്റ്റ്
നിയമസഭയില് ചൊവ്വാഴ്ച ലോകായുക്ത (ഭേദഗതി) ബില് സബ്ജക്ട് കമ്മിറ്റിക്ക് അയക്കാനുള്ള പ്രമേയം അവതരിപ്പിച്ചത് ഞാനാണ്. പ്രസംഗത്തിനിടെ കെ.ടി. ജലീല് ഒരു ചോദ്യം ഉന്നയിച്ചു. അതിനു വഴങ്ങി സീറ്റില് ഇരിക്കുമ്പോള്, പ്രസംഗ സമയം നഷ്ടപ്പെടുമല്ലോ എന്നോര്ത്ത് അടുത്തിരുന്ന സ. സജി ചെറിയാനോട് പറഞ്ഞ ഒരു വാചകം തെറ്റിദ്ധരിപ്പിക്കുന്ന തരത്തില് പ്രചരിപ്പിക്കപ്പെടുന്നത് ഖേദകരമാണ്. അത് ഡോ. ജലീലിനെതിരാണെന്ന ആക്ഷേപം കഴമ്പില്ലാത്തതും ദുരുപദിഷ്ടവുമാണ്.
