കോഴിക്കോട് : കെഎസ്ആര്ടിസി ബസ് ടെര്മിനല് കോംപ്ലക്സിന്റെ നിര്മ്മാണം സംബന്ധിച്ച് ചെന്നൈ ഐ ഐ ടി സ്ട്രക്ചറല് എന്ജിനീയറിങ് വിഭാഗം മേധാവി പ്രൊഫ. അളകസുന്ദര മൂര്ത്തി സമര്പ്പിച്ച റിപ്പോർട്ട് പരിശോധിച്ചു നിര്ദേശങ്ങള് സമര്പ്പിക്കാന് അഞ്ചംഗ വിദഗ്ധ ഉന്നതതല സമിതിയെ ചുമതലപ്പെടുത്തി ഗതാഗത മന്ത്രി ആന്റണി രാജു ഉത്തരവിട്ടു.
ചീഫ് ടെക്നിക്കല് എക്സാമിനര് എസ് ഹരികുമാര് (കണ്വീനര്), ഐഐടി ഖരഗ്പൂര് സിവില് എന്ജിനിയറിങ് വിഭാഗം മേധാവി പ്രൊഫ. നിര്ജര് ധംങ്, കോഴിക്കോട് എന് ഐ റ്റി സ്ട്രക്ചറല് എന്ജിനീയറിങ് വിഭാഗം സീനിയര് പ്രൊഫ.ഡോ. ടി എം മാധവന് പിള്ള, പൊതുമരാമത്ത് വകുപ്പ് ബില്ഡിങ്സ് ചീഫ് എന്ജിനീയര് എല് ബീന, തിരുവനന്തപുരം എന്ജിനീയറിങ് കോളേജ് പ്രൊഫ. കെ ആര് ബിന്ദു എന്നിവര് അടങ്ങുന്ന വിദഗ്ധ സമിതി ആണ് ചുമതലപ്പെടുത്തിയിരിക്കുന്നത്. രണ്ടാഴ്ചയ്ക്കകം റിപ്പോർട്ട് സമര്പ്പിക്കണമെന്നും ഉത്തരവില് ആവശ്യപ്പെട്ടിട്ടുണ്ട്.
