കൊച്ചി : ലോക്ക്ഡൗണിനെ തുടര്‍ന്ന് അടച്ചിട്ട കൊച്ചി മെട്രോ ഇന്ന് രാവിലെ മുതല്‍ വീണ്ടും പ്രവര്‍ത്തനം തുടങ്ങും. കോവിഡ് മാനദണ്ഡങ്ങള്‍ പാലിച്ച്‌ പൂര്‍ണമായും സുരക്ഷിതമായ യാത്രയാണ് മെട്രോ അധികൃതര്‍ വാഗ്ദാനം ചെയ്യുന്നത്. ഇതിനിടെ പേട്ടയിലേക്ക് നീട്ടിയ മെട്രോ ലൈനിന്റെ ഉദ്ഘാടനം വീഡിയോ കോണ്‍ഫ്രന്‍സിംഗിലൂടെ മുഖ്യമന്ത്രി പിണറായി വിജയന്‍ ഇന്ന് നിര്‍വഹിക്കും.
കൊച്ചിയുടെ വേഗതയ്ക്ക് പുതിയമാനങ്ങള്‍ നല്‍കിയ മെട്രോ അടുത്തഘട്ടത്തിലേക്ക് കടക്കുകയാണ്. കോവിഡ് കാരണം നിലച്ച സര്‍വീസുകള്‍ പുനരാരംഭിക്കുന്നതിനൊപ്പം മൊട്രോ യാത്ര പേട്ടവരെ നീളുകയാണ്. നിലവില്‍ ആലുവ മുതല്‍ തൈക്കൂടം വരെയായിരുന്നു സര്‍വീസ്. തൈക്കുടത്ത് നിന്നും ഒരു കിലോമീറ്ററും മുന്നൂറ് മീറ്ററുമാണ് പേട്ടയിലേക്കുള്ളത്. പേട്ടവരെ സര്‍വീസ് നീളുന്നതോടെ 22 സ്റ്റേഷനുകളുമായി മെട്രോ ദൂരം 24.9 കിലോമീറ്ററാകും. പേട്ട സ്റ്റേഷന്‍ തുറക്കുന്നതോടെ കൊച്ചി മെട്രോയില്‍ ഡിഎംആര്‍സിയുടെ ചുമതലകള്‍ പൂര്‍ത്തിയാകും. മറ്റു പാതകളുടെ നിര്‍മ്മാണം കൊച്ചി മെട്രോ കമ്പിനിയായ കെഎംആര്‍എല്‍ നേരിട്ടാണ് നടത്തുന്നത്.
