കൊച്ചി : മെട്രോയുടെ ഇലക്ട്രിക് ബസ് സര്വ്വീസായ ‘മെട്രോ കണക്ട്’ ഇന്ന് മുതല് ആരംഭിക്കും. വിവിധ റൂട്ടുകളിലായി നടത്തിയ പരീക്ഷണ ഓട്ടം വിജയകരമായി പൂര്ത്തിയാക്കിയാണ് ഇന്ന് മുതല് ഔദ്യോഗികമായി സര്വീസ് ആരംഭിക്കുന്നത്. കൊച്ചിയെ പരിസ്ഥിതി സൗഹൃദ നഗരമാക്കുന്നതിനൊപ്പം പൊതുഗതാഗതം പ്രോത്സാഹിപ്പിക്കുക കൂടിയാണ് പദ്ധതിയുടെ ലക്ഷ്യം. ആലുവ-ഇന്റര്നാഷണല് എയര്പോര്ട്ട്, കളമശേരി-മെഡിക്കല് കോളെജ്, ഹൈക്കോര്ട്ട്- എംജി റോഡ് സര്ക്കുലര്, കടവന്ത്ര- കെ.പി വള്ളോന് റോഡ് സര്ക്കുലര്, കാക്കനാട് വാട്ടര്മെട്രോ-ഇന്ഫോപാര്ക്ക്, കിന്ഫ്ര പാര്ക്ക്-കളക്ട്രേറ്റ് എന്നീ റൂട്ടുകളിലാണ് തുടക്കത്തില് ഇലക്ട്രിക് ബസ് സര്വ്വീസുകള് ആരംഭിക്കുക. ആലുവ- എയര്പോര്ട്ട് റൂട്ടില് 80 രൂപയും മറ്റു റൂട്ടുകളില് അഞ്ച് കിലോമീറ്റര് യാത്രയ്ക്ക് മിനിമം 20 രൂപയുമാണ് പൂര്ണമായും എയര്കണ്ടീഷന് ചെയ്ത ഇലക്ട്രിക് ബസിലെ യാത്ര നിരക്ക്. 33 സീറ്റുകളാണ് ഒരു ബസിലുള്ളത്.
ഡിജിറ്റല് പേയ്മെന്റ് വഴിയാണ് പ്രധാനമായും ടിക്കറ്റിങ്ങ്. കാഷ് ട്രാന്സാക്ഷനും ഉണ്ട്. യുപിഐ വഴിയും രൂപേ ഡെബിറ്റ് കാര്ഡ്, കൊച്ചി 1 കാര്ഡ് എന്നിവ വഴിയും പേയ്മെന്റ് നടത്താം. എയര്പോര്ട്ട് റൂട്ടില് നാലു ബസുകളും കളമശേരി റൂട്ടില് രണ്ട് ബസുകളും ഇന്ഫോപാര്ക്ക് റൂട്ടില് ഒരു ബസും കളക്ട്രേറ്റ് റൂട്ടില് രണ്ട് ബസുകളും ഹൈക്കോര്ട്ട് റൂട്ടില് മൂന്നു ബസുകളും കടവന്ത്ര റൂട്ടില് ഒരു ബസുമാണ് സര്വ്വീസ് നടത്തുക. എയര്പോര്ട്ട് റൂട്ടില് തിരക്കുള്ള സമയങ്ങളില് 20 മിനുറ്റ് ഇടവിട്ടും തിരക്കില്ലാത്ത സമയങ്ങളില് 30 മിനുട്ട് ഇടവിട്ടും സര്വ്വീസുകള് ഉണ്ടാകും. രാവിലെ 6.45 മുതല് സര്വ്വീസ് ആരംഭിക്കും. രാത്രി 11 മണിക്കാണ് എയര്പോര്ട്ടില് നിന്ന് ആലുവയിലേക്കുള്ള അവസാന സര്വ്വീസ്. കളമശേരി-മെഡിക്കല് കോളേജ് റൂട്ടില് 30 മിനിറ്റ് ഇടവിട്ട് സര്വ്വീസ് ഉണ്ടാകും.
രാവിലെ 8.30 മുതല് വൈകിട്ട് 7.30 വരെയാണ് സര്വ്വീസ്. കാക്കനാട് വാട്ടര് മെട്രോ -കിന്ഫ്രാ -ഇന്ഫോപാര്ക്ക് റൂട്ടില് രാവിലെ 8 മണിമുതല് വൈകിട്ട് 7 മണിവരെ 25 മിനിറ്റ് ഇടവിട്ട് സര്വ്വീസ് ഉണ്ടാകും. കാക്കനാട് വാട്ടര് മെട്രോ -കളക്ട്രേറ്റ് റൂട്ടില് 20 മിനിറ്റ് ഇടവിട്ട് രാവിലെ 8 മണി മുതല് വൈകിട്ട് 7.30 വരെ സര്വ്വീസ് ഉണ്ടാകും. ഹൈക്കോര്ട്ട്-എംജിറോഡ് സര്ക്കുലര് റൂട്ടില് 10 മിനിറ്റ് ഇടവിട്ട് രാവിലെ 8.30 മുതല് വൈകിട്ട് 7.30 വരെയു കടവന്ത്ര കെ.പി വള്ളോന് റോഡ് – പനമ്പിള്ളി നഗര് റൂട്ടില് 25 മിനിറ്റ് ഇടവിട്ട് രാവിലെ 9 മണിമുതല് വൈകിട്ട് എഴ് മണിവരെയും സര്വ്വീസ് ഉണ്ടാകും.
