ഡൽഹി : എഐസിസി അധ്യക്ഷൻ മല്ലികാർജുൻ ഖർഗെയുമായി കൊടിക്കുന്നിൽ സുരേഷ് എംപി കൂടിക്കാഴ്ച നടത്തി. ഖർഗെയുടെ വസതിയിലെത്തിയായിരുന്നു ഈ കൂടിക്കാഴ്ച നടന്നത്. കേരളത്തിലെ മുഖ്യമന്ത്രി സ്ഥാനത്തെ ചൊല്ലിയുള്ള ചർച്ചകൾ കോൺഗ്രസിനുള്ളിൽ സജീവമാകുന്നതിനിടയിലാണ് ഈ കൂടിക്കാഴ്ച നടന്നത് എന്നത് ഇതിന്റെ പ്രാധാന്യം വർദ്ധിപ്പിക്കുന്നത്. ഇതൊരു സൗഹൃദപരമായിട്ടുള്ള കൂടിക്കാഴ്ച മാത്രമാണെന്നാണ് കൊടിക്കുന്നിൽ സുരേഷ് വ്യക്തമാക്കിയത്. നിലവിലെ രാഷ്ട്രീയ സാഹചര്യങ്ങളെക്കുറിച്ചോ കേരളത്തിലെ മുഖ്യമന്ത്രി ചർച്ചകളെക്കുറിച്ചോ ഖർഗെയുമായി സംസാരിച്ചിട്ടില്ലെന്നും അദ്ദേഹം പറഞ്ഞു.
ഡൽഹിയിൽ എത്തിയപ്പോൾ കോൺഗ്രസ് അധ്യക്ഷനെ നേരിൽ കണ്ടു എന്നത് മാത്രമാണ് ഇതിന്റെ പിന്നിലുള്ളതെന്ന് അദ്ദേഹം വ്യക്തമാക്കി. മല്ലികാർജുൻ ഖർഗെ ബാംഗ്ലൂരിലേക്ക് പോകാൻ ഇറങ്ങുന്ന സമയത്തായിരുന്നു കൊടിക്കുന്നിൽ സുരേഷ് അദ്ദേഹത്തെ കാണാൻ എത്തിയത്. കോൺഗ്രസിനെ സംബന്ധിച്ചിടത്തോളം മുഖ്യമന്ത്രി ആരാകണം എന്നതടക്കമുള്ള ചർച്ചകൾ ആദ്യഘട്ടത്തിലേക്ക് കടക്കുന്നതിനിടയിൽ നടന്ന ഈ കൂടിക്കാഴ്ച രാഷ്ട്രീയ കേന്ദ്രങ്ങൾ ശ്രദ്ധയോടെയാണ് വീക്ഷിക്കുന്നത്.
