കോന്നി : കൊച്ചി ഇടപ്പള്ളി അഞ്ചുമന ദേവീ ക്ഷേത്രത്തിലെ സ്വർണ്ണ കൊടിമരം നിർമ്മിക്കുന്നതിനുള്ള തേക്ക് മരം കോന്നി വനത്തിലേത്. കുമ്മണൂരിലെ വനം വകുപ്പിന്റെ തേക്കുതോട്ടത്തിൽ നിന്നും കണ്ടെത്തിയ ലക്ഷണമൊത്ത തേക്കാണ് കൊടിമരം നിർമ്മിക്കാൻ ഉപയോഗിക്കുന്നത്. കഴിഞ്ഞ ദിവസം രാവിലെ ഏഴരയോടെ ക്ഷേത്രം തന്ത്രി പുലിയന്നൂർ ശശി നമ്പൂതിരിപാട്, മേൽശാന്തി അനീഷ് ദാമോദരൻ എന്നിവരുടെ നേതൃത്വത്തിൽ വൃക്ഷ പൂജ നടത്തി മരം മുറിച്ചതിന് ശേഷം നിലം തൊടാതെ രണ്ട് ക്രയിൻ ഉപയോഗിച്ച് തടി ഉയർത്തി പ്രത്യേക വാഹനത്തിൽ കയറ്റിയാണ് കൊണ്ടുപോയത്.
തുടർന്ന് തന്ത്രി ചേർത്തല തുറവൂർ മഹാദേവ ക്ഷേത്രത്തിൽ ആചാരവിധി പ്രകാരം തേക്ക് മരം സ്വീകരിക്കും. തുടർന്ന് സ്വീകരണത്തിന് ശേഷം 11 മണിക്ക് അഞ്ചുമന ദേവീ ക്ഷേത്രത്തിൽ എത്തിക്കും. മുൻപ് ശബരിമല ക്ഷേത്രത്തിലെത് അടക്കം നിരവധി ക്ഷേത്രങ്ങളിലേക്ക് കൊടിമരം നിർമ്മിക്കുവാൻ കോന്നി വനത്തിൽ നിന്നും തേക്ക് മരങ്ങൾ കൊണ്ടുപോയിരുന്നു.