കോഴിക്കോട് : കേന്ദ്രസര്ക്കാരിനെ നിയന്ത്രിക്കുന്നത് ആര്എസ്എസ് ആണെന്ന് സംസ്ഥാന സെക്രട്ടറി കോടിയേരി ബാലകൃഷ്ണന്. വെസ്റ്റ്ഹില് സമുദ്ര ഓഡിറ്റോറിയത്തിലെ എം കേളപ്പന് നഗറില് പ്രതിനിധി സമ്മേളനം സംസ്ഥാന സെക്രട്ടറി കോടിയേരി ബാലകൃഷ്ണന് ഉദ്ഘാടനം ചെയ്യുകയായിരുന്നു. ഇന്ത്യന് ഭരണഘടനയെ അംഗീകരിച്ച് പ്രവര്ത്തിക്കാന് കേന്ദ്രത്തെ ആര്എസ്എസ് അനുവദിക്കുന്നില്ല. ഫെഡറല് സംവിധാനം അട്ടിമറിക്കുന്നു. കോര്പ്പറേറ്റുകള്ക്ക് വേണ്ടിയാണ് കേന്ദ്രഭരണം. കോര്പ്പറേറ്റുകള്ക്ക് വേണ്ടി കോര്പ്പറേറ്റുകളാല് നിയന്ത്രിക്കപ്പെടുന്ന കോര്പ്പറേറ്റ് ഭരണമാണ് കേന്ദ്രത്തില് നടക്കുന്നത്.
കോര്പ്പറേറ്റുകളുടെ 10 ലക്ഷം കോടി കടം എഴുതിത്തള്ളി. എന്നാല് കര്ഷകരെയും മത്സ്യതൊഴിലാളികളുടെയും കടം എഴുതിതള്ളാന് കേന്ദ്രം തയ്യാറല്ല. ലോകത്തെ ദരിദ്രരില് 60% ഇന്ത്യയിലാണ്. ഇവിടെ ജനങ്ങളുടെ മേല് അധികഭാരം അടിച്ചേല്പ്പിക്കുകയാണ്. കാര്ഷികമേഖല കോര്പ്പറേറ്റുകള്ക്ക് നല്കാന് നീക്കം നടന്നു. രാജ്യത്ത് തൊഴില് നിയമം ഭേദഗതി ചെയ്തു. ഇതിനെതിരെ ശബ്ദിച്ചാല് അടിച്ചമര്ത്തും. അമിതാധികാര ഭരണമാണ് കേന്ദ്രത്തിന്റേത്. രാജ്യത്തെ പോലീസ് സ്റ്റേറ്റ് ആക്കി മാറ്റി. യുഎപിഎ കേസുകള് വര്ദ്ധിക്കുന്നു. കേന്ദ്ര ഏജന്സികളെ ഉപയോഗിച്ച് എതിരാളികളെ അടിച്ചമര്ത്താന് നോക്കുകയാണെന്നും അദ്ദേഹം ആരോപിച്ചു.