തിരുവനന്തപുരം : സമരക്കാരുടെ മുന്നില് വാഹനം ഓടിച്ച് പ്രകോപനമുണ്ടാക്കുമ്പോളാണ് അക്രമ സംഭവങ്ങളുണ്ടാകുന്നതെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്. ഓട്ടോറിക്ഷകളില് പോകുന്നവരെ സമരക്കാര് ആക്രമിച്ചത് അത്തരമൊരു സംഭവത്തിലാണ്. അത്തരം പ്രകോപനങ്ങള് ഉണ്ടാകാതിരിക്കാന് പൊതുജനങ്ങള് ശ്രദ്ധിക്കണമെന്നും കോടിയേരി പറഞ്ഞു. തിരുവനന്തപുരത്ത് മാധ്യമപ്രവര്ത്തകരോട് സംസാരിക്കുകയായിരുന്നു അദ്ദേഹം. ജനാധിപത്യപരമായി പ്രതിഷേധിക്കാനുള്ള അവകാശം നിഷേധിക്കുന്നത് ജനാധിപത്യ സംവിധാനത്തിന് വെല്ലുവിളിയാണ്. സര്ക്കാര് ജീവനക്കാര് പണി മുടക്കരുതെന്ന കോടതി വിധി ദൂരവ്യാപക പ്രത്യാഘാതമുണ്ടാക്കുന്നതാണെന്നും അദ്ദേഹം മുന്നറിയിപ്പ് നല്കി.
ദേശീയ പണിമുടക്കുമായി ബന്ധപ്പെട്ടു മാത്രമല്ല നാളെ ശമ്പള വര്ധനവ് അടക്കമുള്ള ആനുകൂല്യങ്ങള്ക്ക് വേണ്ടിയും പണിമുടക്കാനുള്ള അവകാശം സര്ക്കാര് ജീവനക്കാര്ക്ക് ഇതോടെ ഇല്ലാതാകുകയാണ്. ഒരു പ്രതികരണവും പാടില്ല. നാവടക്കൂ.. പണിയെടുക്കൂ എന്ന അടിയന്തരാവസ്ഥയുടെ ശബ്ദമാണ് ഇപ്പോള് പുറത്തുവന്നിരിക്കുന്നത്. ഇത്തരം നിലപാടുകള് പുനഃപരിശോധിക്കാന് ജുഡീഷ്യറി തയാറാകണമെന്ന് കോടിയേരി ആവശ്യപ്പെട്ടു. ഹൈക്കോടതി നേരത്തെ ബന്ദ് നിരോധിച്ചു. ഇപ്പോള് സര്ക്കാര് ജീവനക്കാരുടെ പണിമുടക്ക് നിരോധിച്ചുകൊണ്ടുള്ള ഉത്തരവ് ഹൈക്കോടതി പുറപ്പെടുവിച്ചിരിക്കുകയാണ്. ജനാധിപത്യ പ്രക്രിയയില് ധാരാളം പണിമുടക്കുകളും സമരങ്ങളും കൊണ്ടു കൂടിയാണ് മാറ്റങ്ങളുണ്ടായത്.
ബ്രിട്ടീഷുകാര്ക്കെതിരെ തൊഴിലാളികള് പണിമുടക്കിയത് കോടതിയുടെ അംഗീകാരത്തോടെയായിരുന്നില്ല. കോടതി അതിനെതിരായിരുന്നു. സര്ക്കാര് ജീവനക്കാര് ഒരു ദിവസത്തെ വേതനം നഷ്ടപ്പെടും എന്നു കണക്കാക്കിത്തന്നെ പണിമുടക്കില് പങ്കെടുക്കണം. പണിമുടക്കു ദിവസം നമുക്ക് ശമ്ബളം ഉണ്ടാകില്ലെന്ന ബോധത്തിലേക്ക് സര്ക്കാര് ജീവനക്കാര് മാറണം. ആ നിലയിലേക്ക് സര്ക്കാര് ജീവനക്കാരുടെ രാഷ്ട്രീയ നിലവാരം ഉയര്ത്താന് സഹായകരമായ തുടര് ഇടപെടല് സര്ക്കാര് ജീവനക്കാരുടെ സംഘടനകളുടെ ഭാഗത്തുനിന്നും ഉണ്ടാകണം.
ജീവനക്കാരെ സംബന്ധിച്ചിടത്തോളം ഇതൊരു പുതിയ വെല്ലുവിളിയാണ്. സമരം സര്ക്കാര് സ്പോണ്സേര്ഡ് അല്ല. വാഹനം തടയുന്നത് നിരുത്സാഹപ്പെടുത്തേണ്ടതാണ്. ജനങ്ങള് സ്വമേധയാ പണിമുടക്കില് പങ്കെടുക്കണമെന്നാണ് സമരസമിതി ഉദ്ദേശിച്ചിട്ടുള്ളത്. സിഐടിയു മാത്രമല്ല കൂടുതല് ആളുകള് പണിമുടക്കില് പങ്കെടുക്കുന്നുണ്ട്. ഐഎന്ടിയുസി, എഐടിയുസി, എസ്ടിയു തുടങ്ങിയ സംഘടനകളും പണിമുടക്കിലുണ്ടെന്നും കോടിയേരി ബാലകൃഷ്ണന് വ്യക്തമാക്കി.