കണ്ണൂര്: കേരളത്തെ പിടിച്ചുകുലുക്കിയ ബലാത്സംഗ, കൊലക്കേസ് പ്രതിയായ കൊടുംക്രിമിനല് ഗോവിന്ദച്ചാമി ജയില് ചാടിയ വിവരം അധികൃതര് അറിഞ്ഞത് അഞ്ച് മണിക്കൂര് കഴിഞ്ഞ്. രാവിലെ പരിശോധനയ്ക്കിടെയാണ് ഗോവിന്ദച്ചാമി സെല്ലിലില്ലെന്ന വിവരം മനസ്സിലായത്. അതീവസുരക്ഷയുള്ള ജയിലില് നിന്നാണ് ജീവപര്യന്തം തടവുശിക്ഷ അനുഭവിക്കുന്ന ഗോവിന്ദച്ചാമി രക്ഷപ്പെട്ടത് എന്നത് ആശങ്കയുളവാക്കുന്നു. അര്ധരാത്രി 1.10-നാണ് ഇയാള് ജയില് ചാടിയതെന്നാണ് ഇപ്പോള് ലഭിക്കുന്ന വിവരം. ജയില്ക്കമ്പി മുറിച്ചാണ് ഇയാള് രക്ഷപ്പെട്ടിരിക്കുന്നത്. ഇലക്ട്രിക് ഫെന്സിങ് പ്രവര്ത്തിച്ചില്ല എന്നും കരുതപ്പെടുന്നു.
ഒരു കൈ ഇല്ലാത്ത അരം പോലുള്ള ആയുധം ഉപയോഗിച്ചാണ് ഗോവിന്ദച്ചാമി സെല്ലിന്റെ കമ്പി വളച്ചതെന്ന് കരുതുന്നു. കണ്ണൂര് സെന്ട്രല് ജയിലിന്റെ മതില് ചാടിക്കടക്കാനായി ഇയാള് തുണി കൂട്ടിക്കെട്ടി ഫെന്സിങ്ങില് കൊളുത്തി അതില് കയറുകയായിരുന്നു എന്നാണ് സംശയം. ജയില്വളപ്പിലുണ്ടായിരുന്ന വീപ്പകള് ഇതിനായി ഉപയോഗിച്ചെന്നും സംശയമുണ്ട്. ഇലക്ട്രിക് ഫെന്സിങ് അടക്കമുണ്ടായിട്ട് എങ്ങനെ അത് മറികടക്കാനായി എന്ന ചോദ്യവും ഉയരുന്നു. ഏകദേശം ഏഴര മീറ്റര് ഉയരമുള്ള മതിലാണ് ഒരു കൈ മാത്രമുള്ള പ്രതി ചാടിക്കടന്നത്.
