കൊല്ലം: കൊല്ലം പോര്ട്ടിന് ഏറെ പ്രതീക്ഷകള് സമ്മാനിച്ച തീരദേശ കപ്പല് സര്വ്വീസായ ഗ്രീന് ഫ്രൈറ്റ് കോറിഡോറും പൊളിയുമെന്ന് ആശങ്ക. കൊച്ചിയില് നിന്ന് ചരക്കുമായി കൊല്ലത്തെത്തുന്ന കപ്പില് തിരികെ ‘കാലി’യടിച്ച് പോവേണ്ട അവസ്ഥയാണ്. റിട്ടേണ് കാര്ഗോ കൂടി ലഭിച്ചില്ലെങ്കില് സര്വീസ് ലാഭകരമല്ലാത്തതിനാലാണ് സര്വീസ് ഓപ്പറേറ്റ് ചെയ്യുന്ന സ്വകാര്യ ഏജന്സി പിന്വലിഞ്ഞ് നില്ക്കുന്നത്.
ആദ്യഘട്ടം മാസത്തില് ഒരിക്കലും പിന്നീട് രണ്ടു തവണ വീതമെങ്കിലും ചരക്കുമായി കൊല്ലത്തെത്തുമെന്നായിരുന്നു പ്രഖ്യാപനം. എന്നാല് ആദ്യ സര്വ്വീസ് വന്നുപോയി ഒന്നരമാസം പിന്നിട്ടിട്ടും അനക്കമൊന്നുമില്ല. കൊല്ലത്തു നിന്നു ചരക്ക് ഇല്ലാതെയാണ് കപ്പല് മടങ്ങിയത്. ബേപ്പൂര്, അഴീക്കല്, കൊച്ചി തുറമുഖങ്ങളെ ബന്ധിപ്പിച്ചുകൊണ്ടാണ് മാരിടൈം ബോര്ഡ് ആദ്യം ഗ്രീന് ഫ്രൈറ്റ് കോറിഡോര് എന്ന പേരില് തീരദേശ കപ്പല് സര്വീസ് ആരംഭിച്ചത്. സെപ്തംബറില് സര്വ്വീസ് കൊല്ലത്തേക്കു നീട്ടി.
ഇതിന്റെ ഭാഗമായി എഫ്.സി.ഐയുടെ 47 കണ്ടെയ്നര് ഭക്ഷ്യധാന്യങ്ങളുമായി ചൗഗ്ലേ 7 എന്ന കപ്പല് കൊല്ലം പോര്ട്ടില് എത്തിയിരുന്നു. കൊല്ലത്ത് നിന്നു മറ്റ് തുറമുഖങ്ങളിലേക്ക് ചരക്ക് ലഭിക്കാത്തതിനാല് ഒഴിഞ്ഞ കണ്ടെയ്നറുകളുമായാണ് കപ്പല് മടങ്ങിയത്. കൊല്ലത്തേക്ക് കൊണ്ടുവരാന് എഫ്.സി.ഐയുടെ ഭക്ഷ്യധാന്യം തുടര്ച്ചയായി കൊച്ചിയില് നിന്നു ലഭിക്കും. എന്നാല് മാരിടൈം ബോര്ഡും സര്വ്വീസ് ഓപ്പറേറ്റ് ചെയ്യുന്ന സ്വകാര്യ ഏജന്സികളും ആഞ്ഞു ശ്രമിച്ചിട്ടും കൊല്ലത്ത് നിന്നു ചരക്ക് ലഭിക്കുന്നില്ല. ഇക്കാരണത്താല് ത്തന്നെ നേരത്തെ കൊല്ലം- ഗുജറാത്ത് റോ റോ സര്വ്വീസ്, കൊച്ചി- കൊല്ലം ചരക്ക് സര്വ്വീസ് എന്നിവ മുടങ്ങിയിരുന്നു.
