കോന്നി : പ്രളയവും കോവിഡും പ്രതിരോധിക്കുവാൻ ജനകീയ ഇടപെടൽ നടത്തിയ കോന്നി പോലീസ് സർക്കിൾ ഇൻസ്പക്ടർക്ക് ഉദ്യോഗകയറ്റത്തോടെ സ്ഥലം മാറ്റം. കോന്നി സി ഐ എസ് അഷാദിനാണ് എറണാകുളം വിജിലൻസ് ഡി.വൈ.എസ്.പിയായി സ്ഥാനകയറ്റം ലഭിച്ചത്.
2018ൽ കോന്നി പോലീസ് സ്റ്റേഷൻ ഹൗസ് ഓഫീസറായി ചുമതലയേറ്റ ഇദ്ദേഹം അഞ്ച് മാസങ്ങൾ പിന്നിട്ടപ്പോഴാണ് മഹാപ്രളയത്തെ നേരിട്ടത്. പ്രളയ കാലഘട്ടത്തിൽ കോന്നിയിലുണ്ടായ എല്ലാ പ്രതിസന്ധികളേയും ഇദ്ദേഹം അതിജീവിച്ചു. പ്രളയത്തിൽ വീടിനുള്ളിൽ അകപ്പെട്ട നൂറുകണക്കിന് ആളുകളെയാണ് കുട്ടവഞ്ചിയുടേയും മറ്റും സഹായത്തോടെ വീടിന് പുറത്തെത്തിച്ച് സുരക്ഷിത സ്ഥാനത്തേക്ക് മാറ്റിയത്. പിന്നീട് പ്രളയ ദുരിതാശ്വാസ ക്യാമ്പുകളിലേക്കാവശ്യമായ ഭക്ഷ്യ സാധനങ്ങൾ ഉൾപ്പെടെ എത്തിച്ച് നൽകുന്നതിനും നേതൃത്വം നൽകി. ഇപ്പോൾ രാജ്യമാകെ കൊറോണ വ്യാപിച്ചത് ജില്ലയിലും സ്ഥിരീകരിച്ച നാൾ മുതൽ കോന്നി ജനമൈത്രി പോലീസിനേയും സഹപ്രവർത്തകരേയും കോർത്തിണക്കി മാതൃകാപരമായ പ്രവർത്തനം കാഴ്ച്ച വെച്ചുകൊണ്ടിരിക്കുന്നതിനിടയിലാണ് ഇദ്ദേഹത്തിന് എറണാകുളം വിജിലൻസ് റേഞ്ച് ഡി വൈ എസ് പിയായി ചുമതലയേൽക്കേണ്ടി വരുന്നത്.