കോന്നി: കൊറോണ പ്രതിരോധ പ്രവർത്തനങ്ങളുടെ ഭാഗമായി കോന്നി നഗരത്തിൻ്റെ വിവിധ ഇടങ്ങളിൽ കോന്നി ഫയർഫോഴ്സിൻ്റെ നേതൃത്വത്തിൽ ശുചീകരണ പ്രവർത്തനങ്ങൾ നടത്തി.
ആരോഗ്യ വകുപ്പിൽ നിന്ന് ലഭിച്ച പ്രത്യേക ശുദ്ധീകരണ ലായനി വെള്ളത്തിൽ കലർത്തിയാണ് നഗരത്തിലെ വിവിധ ഇടങ്ങൾ സംഘം ശുചീകരിച്ചത്. നഗരത്തിൽ ഏറ്റവും കൂടുതൽ ജനങ്ങൾ എത്തുന്ന സ്ഥലങ്ങളായ കോന്നി നാരായണപുരം ചന്ത, കൃഷി ഓഫീസ്, സി ഐ ഓഫീസ്, എ റ്റി എം കൗണ്ടർ, കോന്നി മാർക്കറ്റിംഗ് സൊസൈറ്റി ഭാഗം, വെയ്റ്റിംഗ് ഷെഡ് തുടങ്ങിയ സ്ഥലങ്ങളിലാണ് ഫയർഫോഴ്സ് അധികൃതർ ശുചീകരിച്ചത്. നാല് മണിക്കൂർ നീണ്ട ശുചീകരണ പ്രവർത്തനങ്ങൾക്ക് കോന്നി ഫയർഫോഴ്സ് ഉദ്യോഗസ്ഥരായ ശശികുമാർ, ബ്രോൺ, സന്തോഷ്, അനൂപ്, സജീവ് ഖാൻ, വിനീത് തുടങ്ങിയവർ നേതൃത്വം നൽകി.
